France chakna Mbappe

Kylian Mbappe-a'n PSG-a a contract neih lai a pawhsei dawn loh thu a sawi avangin khawthlang media-ten a chanchin an ziak nasa. PSG forward Mbappe hi France captain a nih bawk avangin media a hmachhawn tam a, khelmual pawn lam zawhna a dawng nasa hle.

Stade de France-ah Les Bleus-in Greece an mikhual a, Mbappe tan khelmual chhunga hming chherna remchang a ni. Antoine Griezmann lakah Greece player Konstantinos Mavropano-a'n penalty a chawi a, Mbappe-a'n France chakna goal khung nan a hmang a, Les Bleus hi 1-0 in an chak. Mbappe hian tun season chhungin ram leh club tan goal 54 a khung tawh a, season khat chhunga French player goal khung tam ber a ni.

Mbappe hi a vannei a, a penalty pet hmasak zawk chu keeper Odysseas Vlachodimos-a'n a dang. Greece player zingah box chhunga tlan lut hman an awm avangin Mbappe-a'n penalty hi a pet nawn a, ṭha zetin a pet lut. France hi match li khelh tawhah an la chak vek a, Euro 2024-ah an inlan ngei a rinawm hle.