PSG leh Luis Enrique an inhnaih zel

French champion Paris St-Germain chuan coach atan Luis Enrique an lalut hnai a, he thuziak i chhiar meuh chuan Spanish coach nen hian an inrem tawh hial mai thei.

PSG hian he thu buatsaih a nih lai hian an coach Christophe Galtier an la ban lo a, mahse, kum 56 mi coach hi an ban ngei a rinawm - Enrique hma hian Bayern Munich manager ban tak Julian Nagelsmann pawh an lo dawr tawh!

Mahse, French club hi Nagelsmann nen an inrem thei lo a, Barcelona coach hlui Enrique lam an hawi zui - Spanish coach hian December 2022-a Spain a chhuahsan hnuah team enkawl a nei leh tawh rih lo.

Kum 53 mi coach hi Chelsea nen pawh sawizawm a ni hman a, mahse, Blues hian PSG boss hlui Mauricio Pochettino lam hawi zawkin Argentine coach hian London club hi season thar aṭangin a enkawl ang.

Enrique hian Spain coach a nihna angin nomawi chawi nei lo mah se 2014-15 season khan Barcelona chu treble champion a nihpui a, La Liga (2), Copa del Rey (3), Spanish Super Cup (1), Champions League (1), UEFA Super Cup (1) leh FIFA Club World Cup (1) ah te hnehna hlado a chhampui thei.

Player langsar tak tak lalut a, team ropui din tum PSG hian an beisei Champions League nomawi ber an la chawi theih loh avangin an tihdan thlak a, team thar din tumin hma an la mak e, Enrique hoin eng nge an an ang, tih chu hunin a la hril ang.