Gerrard-a'n Saudi sawmna a hnar

Liverpool legend Steven Gerrard chuan Saudi Arabia aṭangin sawmna hmu mah se a hnar thu a sawi a, Aston Villa coach an ban tak hian coaching hna la chelh leh lo mah se sum tamna Saudi lam pan a tum lo.

Gerrard hi June thla khan Saudi Arabia-ah hmuh a ni a, Al-Ettifaq nen sawizawm an ni. Mahse, Rangers aṭanga coaching lama hming chhertu Gerrard chuan Saudi club sawmna hi a hnar thu a sawi.

Kum 43 mi Gerrard chuan, "Saudi aṭanga sawmna ka hmuh angin ka kal ngei a, hun engemaw chen chu min sawmna chungchang hi ka ngaihtuah. Mahse, tun dinhmunah chuan Saudi sawmna hi pawm lo mai turin thutlukna ka siam a ni," a ti.

Gerrard hian Aston Villa-ah khan kum khatah pound maktaduai nga a hlawh nia sawi a ni a, Villa coach ni tawh zinga hlawh hnem ber record a siam - Al Ettifaq hian kum khata euro maktaduai 20 hlawh turin an sawm niin an sawi.

Liverpool coach ni mek Jurgen Klopp hian Reds-ah season khatah euro maktaduai 18 a hlawh nia sawi a ni a, Gerrard hian Saudi club sawmna hi pawm se chuan Klopp aiin euro maktaduai hnihin a hlawh hnem dawn, tihna a ni.

Mahse, player a nih lai pawha sum tamna aia Liverpool thlangtu hian sum vanga Saudi pan tumna a nei rih lo niin a lang a, level sang zawka team enkawl a châk zawk niin a lang.

Gerrard hian kum 2016 khan inkhelh chawlhsanin, coaching lam a luhchilh zui a, Liverpool academy lama a inzir hnuin kum 2018 khan Scottish club ropui Rangers a zawm.

Rangers hi season 10 hnua a vawi khat nan Scottish Premiership nomawi a chawipui a, November 2021 khan Premier League-a chona hmachhawn turin Villa a pan.

Mahse, Villa Park-ah beisei a phak lo a, match 40 a enkawlah vawi 13 chiah hnehna chanpuiin, thla 11 chiah hun a hmang hman tihin a hna aṭang hian chawlhtir a ni.