Aw, Barca 'fan' tho la, hlim takin zai rawh!

La Liga nomawi chawi loh avanga lawm lohna a liam ṭan a, Barcelona fan-te hlim takin an zai ṭan ve leh ta. Inrinni zan khan Champions League last 16 second leg-ah Barca hian 3-1 in Napoli an hneh. 

Nou Camp-a team pahnih intawn hma hian Napoli khelmual San Paolo Stadium-ah 1-1 in an lo inhnehtawk tawh a, La Liga nomawi an hloh bawk si avangin Lionel Messi-a'n na takin an team a lo sawisel tawh.

Mahse, Barca-in Napoli lakah game mawi phochhuakin an thiampuipa lungawi lohna an vai kiansak a, goal thum ngawt an khung. Clement Lenglet, Messi leh Luis Suarez (penalty) ten goal khat ṭheuh an khung a, Napoli tana Lorenzo Insigne penalty pet goal-in awmzia a nei lo - inkhel pahnih belhkhawmah 4-2 in Barca an chak. 

Barcelona-in hnehna an chan avangin coach Quique Setien chu a him rih tiin a sawi theih bawk a, fiahna tak tak erawh quarterfinal-a Bayern Munich nen an intum hunah an hmachhawn ang. 

Inkhel ṭan aṭanga minute 10-na lekah Barca-in goal an khung a, kum 25 mi defender Lenglet chuan ṭha zetin a tauh lut. Inkhelh hmain Napoli coach Gennaro Gattuso-a'n Barca hneh tum chu Mt. Everest lawnchhuah tum ang a nih thu a sawi a, minute 10 chhungin a thusawi dikna a lang ṭan nghal. 

Minute 23-na a ni a, Messi ropuina hmuhtirin kan awm. Argentine forward hian kum 33 ni tawh mah se footballer dang chunga leng a ni tih pholangin Napoli defender a pal darh hnuah finishing tawih lutuk hmangin goal a khung a, 2-0 a ni. 

Barcelona-in an la duhtawk lo cheu - Messi-a'n penalty a hlawh chhuak a, duhsak takin Suarez a kian. Uruguayan striker hian harsatna nei loin goal-ah a chantir a, penalty a pet lai hian Messi chuan a pheikhawk hrui a lo suih ṭha - a ṭhianpa a ringtawk hle. 

First half hun pek belh minute ngana a ni a, Napoli hun a her chhuak ve thung. Barca midfielder Ivan Rakitic chuan Dries Mertens laka a foul avangin penalty a chawi a, Lorenzo Insigne chuan 'cool' zetin goal-ah a chantir. 

Napoli hian second half-ah Barca an nawr a, goal hnih an khung leh chuan away goal rule hmangin an tlang thei tih an hria - mahse substitute Arkadiusz Milik-a goal khung chu offside vangin pawm a ni lo a, Insigne leh Hirving Lozano ten an hun ṭha neih an chhawr lo. 

Nou Camp-a inkhelah Messi tih loha langsar chu VAR a ni a, Argentine striker ropui lehzualna tur daltu tiin a sawi theih bawk. Messi hian a goal hnihna ni ngei tura lang chu mawi zetin a khung a, mahse VAR hmanga ennawn a nih hnuah handball vangin pawm a ni lo. Ennawn erawhin referee-in huaisen takin thutlukna a siam tih a hriat. 

Messi-a penalty hlawhchhuah erawh VAR hmang thoa pek a ni thung a, a tirah referee-in pe lo mah se video assistant referee hmanga hrilh hriat a nih hnuah referee hian a thutlukna thlakin penalty a pe. 

Messi-a'n Napoli laka goal a khung avangin Champions League-a team a hmachhawn 35 lakah goal a khung ta a, amah hnaih bertu Cristiano Ronaldo chuan club 33 lakah a khung tawh thung.

Barcelona boss Setien-a'n January-a Barcelona enkawl hna a thawh ṭan khan La Liga table-ah hma hruaitu a ni a, season a tawp meuh erawh chuan Real Madrid phak loin pahnihna an ni. 

Napoli laka an chak loh chuan Setien hian a hna a chan mai ring tam tak an awm a, mahse game mawi leh result ṭha a chhawp chhuak. Real Betis boss hlui chuan, "Ka team ten an khel ṭha a, he result hlawhchhuah hi kan phu a ni," a ti.  

Setien chuan Bayern nena an inhmachhawn tur thlir lawkin, "Champions League-a la dam team zingah ṭha lo an awm lo a, game hautak hlir a awm tawh. Quarterfinal paltlang a harsa dawn a, Bayern tan a awl bik lo ang. Team ṭha tak an ni a, keini pawh team ṭha tak tho kan ni," tiin a sawi. 

Napoli boss Gattuso chuan, "Bul kan ṭan ṭha a, a tir lamah khan goal khung thei kan ni. Ka player-te an chak ṭha a, mahse an rilru puthmang an thlak a ngai a ni. Kha aia ṭha zawka khel thei kha kan ni tih ka hria a, ka lawm lo a ni," a ti a, a naute rilru a huaisen tawk loah a ngai.