Spanish champion pet chhuaktu City
Manchester City chuan an champion châkna ber Champions League-a nomawi chawi turin hmalam an pan zel a, inelnaa record nei ṭha ber leh Spanish champion ni bawk Real Madrid chu 2-1 in an hneh.
Pep Guardiola naute hian Santiago Bernabeu-ah 2-1 in Real an lo hneh tawh a, Etihad Stadium-ah 2-1 bawkin an lo hneh nawn - inkhel pahnih belhkhawmah 4-2 in an chak a, ṭhangthar manager ropui pahnih inhmachhawnnaah Zinedine Zidane aiin Pep a chungnung zawk.
Real Madrid chak loh chhanah mimala mawhpuh tur an awm a nih chuan Raphael Varane chu kawh rawn tur a ni a, French defender hi hrem vanga inlan thei lo captain Sergio Ramos kaihhruaina tel loin a rintlak tawk lo. Varane hian minute kuana lekah tihsual a nei nghal. Gabriel Jesus 'pressing' chu dawl zo loin French defender hian ball a hloh a, Brazilian striker hian Raheem Sterling tan a siamsak zui - English forward tana goal-a chantir a harsa lo.
Minute 28-naah Varane chetsualna thup mawi sakin striker tal na tak Karim Benzema chuan Real tan a khung ve leh a, beiseina an la nei. Mahse, minute 68-naah Varane bawk a chesual - a bulah Jesus a awm tih hre reng chungin Thibaut Courtois chu a lu hmanga ball tauhin a back pass a, Belgian keeper tan man hman a ni lo. Jesus chuan ball hi nangchingin goal-ah a chantir a, 2-1 in City an chak.
Kum 27 mi Varane-a'n a tihsual pawmin, "Kan chak loh chhan hi keimah a ni a, ka tihsualah thiamthu sawi tur ka nei lo," a ti. Real boss Zidane chuan, "Kan chak lo a, petchhuah kan nih bawk avangin lawm a harsa. Mahse, hei hi football chu a ni a, team ṭha tak lakah kan tlawm tih hi kan pawm a ngai a ni," a ti a, French coach hi Real boss a nih hnua Champions League aṭanga petchhuah a nih vawi khatna a ni!
City boss Pep chuan, "He hmunah hian Champions League nomawi chawi tura awm kan ni. Real hneh hi a tawkah kan ngai a nih chuan club tenau kan ni tih pholanna chauh a ni ang. Nomawi chawi tur chuan team ṭha hneh a ngai a ni," a ti a, an zinkawng a la inṭan chauh thu a sawi - quarterfinal-ah Lyon an hmachhawn ang.