RONALDO 200 = Not OUT! Chawimawina hlan a ni

Player-ten kum 30 an tlin tawh chuan uaithlak lam an pan tawha kan ngaihna kha a la rei lo a, hmanni lawk tak tak kha a ni. Mahse, Cristiano Ronaldo te ang, player thawkrim leh hlawhtlin duh an lo lan meuh chuan, he thawnthu hi her danglamin a awm.

Thawhlehni zan khan Ronaldo hian Portugal tana a match 200-na a khel a, international football-a match 200 khel tling hmasa ber a ni - Ronaldo hi ram tana inlan tam ber a nih avangin Guinness World Records chuan inkhelh hmain chawimawina an hlan.

Kum 38 mi Ronaldo hian ram tan match 200 a khel tling a ni satliah lo - Portugal tana mellung pawimawh a phun zanah hian goal a khung bawk a, Euro qualifier match-ah hian Iceland chu 1-0 in an hneh a ni.

Portugal hi group J-ah awmin, match li an khelh tawhah hnehna an la chang vek a, Germany-in a thlen tur Euro 2024-ah Ronaldo leh a ṭhiante kan hmuh ngei a rinawm - chutih hunah chuan Ronaldo pawh kum 39 a ni tawh ang!

Record neitu

Ronaldo hian international football-a match khel hnem ber record hrim hrim hi chu March thla khan a lo siam tawh a, Kuwait forward Bader Al-Mutawa a khum - ani hian ram tan match 196 khelin goal 56 a khung a, Ronaldo khelh mekna Al Nassr player hlui a ni.

Kum 2003-a ram tana a match hmasa ber khel a, kum 20 zet Portugal tana inlan tawh Ronaldo chuan, "Ka tan chuan a awihawm loh hial zawk a, a ropui takzet. Chakna goal ka khung khan a tihlu lehzual a ni," a ti.

Saudi club Al Nassr tana khel mek Ronaldo hian minute 89-naah inkhela goal awmchhun hi a khung a, hun tawp nan minute 10 chauh a awm tawh tihah Iceland player Willum Willumsson chu a yellow card pahnihna avanga hnawhchhuah niin, Portugal hian a tam zawk nih an chhawr zui a ni.

Ronaldo tan Iceland laka a goal hi Euro 2024 qualifier khelh meka a goal ngana chiah a ni a, Manchester United forward hlui hian football level hniam zawk khel tawh mah se Europe-a goal khung a ṭhulh phah lo.

A pawimawh ber

Ronaldo chuan inkhel thlirkirin, "Kan khel ṭha tawk lo a, mahse, a chang chuan football chu hetiang hi a ni mai. Goal kan khung miau a, chak kan phu zawkah ka ngai a ni.

"Match 200 ka khelh tlin avangin ka lawm a, chu ai mah chuan hnehna kan chang hi ka lawm a ni," a ti a, a record siam chu ropui viau mah se an ramin hnehna an chang chu a ngaih pawimawh zawk thu a sawi.

Ronaldo hian ram tan match 200 a khelhah goal 123 ngawt a khung tling ta a, international football-a goal khung tam lama a lehpel tak Ali Daei khan Iran tan match 148 khelin goal 109 a khung.

International football la khel mek zingah Ronaldo hnaih bertu chu Lionel Messi niin, world champion forward hian Argentina tan match 175-ah goal 103 a khung a, pathumna Sunil Chhetri chuan India tan match 137-ah goal 87 a khung thung.