Uzbekistan lakah India an tlawm

AFC Under-17 Asian Cup 2023 khelh meka an match hnihnaah India an tlawm a, team ṭha Uzbekistan chu 1-0 in an ngam lo - Blue Tigers tan knockout round lut turin beisei la bo lo mah se, an hmabaka awm hi Japan an nih miau avangin a awlsam dawn lo.

India tan Mizo rawlthar duhawm Vanlalpeka Guite, Lalpekhlua leh Thanglalsoun Gangte ten inkhel bul an ṭan vek a, mahse, beisei angin danglamna an thlen thei bik lo a, India tan Uzbekistan an ṭha hret.

Khawzawl rawlthar Vanlalpeka (Sentea) chuan, "Uzbekistan lakah kan game plan a fuh tawk loah ka ngai a, player ṭhenkhatin holam taka tihsual an neih ṭhin avangin chu chu kan tuar bawk," tiin Vanglaini a hrilh.

Blue Tigers tan hian Korou Singh chuan goal khungna remchang a nei a, mahse, Lalpekhlua siamsak aṭanga a chance neih hi Uzbekistan goalkeeper Muhammadyusuf Sobirov chuan ṭha takin a dansak.

Sentea'n Danny Meitei tana siamsak pawh Manipur rawltharin goal-ah a chantir thei chuang lo a, team pahnih an inhnehtawk mai dawna a lan hnuah Uzbekistan tan Mukhammedali Reimov chuan minute 82-naah inkhela goal awmchhun a khung a ni.

India tana number 10 hatu Sentea chuan, "Kan hmachhawn tawh team en ila, keini aia an ṭhat viauna ka la hmu lo - kan game kan la khel chhuak thei lo mai mai a ni," a ti a, an vanduai thu Vanglaini a hrilh.

Blue Tigers hian match hmasa berah Vietnam chu 1-1 in an inhnehtawkpui a, Thawhlehni inkhel dangah Japan chuan India nena inhnehtawk Vietnam hi 4-0 in an sawp - India tan knockout round lut turin, match tawp bera Japan hneh a ṭul dawn.

AFC U17-ah hian point inangah head-to-head en a ni dawn - Japan leh Uzbekistan-in point li ve ve an nei tawh a, India hian Japan an hneh chuan point li neiin an tlang thei ang.