Durtlang North zinkawng a tawp; Zaninah Tuipuiral vs Tuichangral

Tata SK 712 Pro Volleyball League aṭangin champion lai Durtlang North chu hneh nei loin an tla. Thawhlehni zan Pro Volleyball inkhel hmuhnawmah Tuipuiral chuan Durtlang North hi 3-2 (14-25, 20-25, 25-23, 25-23, 17-15) in an hneh.

R. Dengṭhuama Indoor Stadium, Mualpuia inkhelah Tuipuiral tan Anurag Rawat-a chuan point 62 tehmeuh a hlawh chhuak a, tualchhung volleyball inelna sang berah hian match khata point nei hnem ber record a siam.

Tuipuiral hian set hmasa pahnih hloh mah se huaisen takin an bei let - Delhi aṭanga an chah chhuah Anurag hian an team point hmuh zawng zawng aṭanga 61% chu a thawhchhuah a ni a, a phu ang ngeiin D3 Business Player of the Match atan thlan a ni.

Tun season PVL bikah chuan Tuipuiral hi an chak vawi khatna chauh a ni, mahse semifinal an la beisei thei. Point thum hmuin palina an ni mek a, an hnuahah point hnih neitu Tuichangral an awm thung.

Tuipuiral leh Tuichangral te hi June 22, Ningani zanah an intawng dawn - a chak zawkin semifinal an lut ang. Thutak Nunpuitu Team (TNT), Hunthar leh Chhinga Veng Spikers te chuan semifinal an inhlangkai fel tawh a ni.

Season hmasa khan Chhinga Veng Spikers chu a kum hmasa lama an champion hnuah an mualpho tawh a, semifinal lut phak loin an tla. Kuminah Durtlang North lamain Spikers lamin sulhnu duhawm lo tak an hnutchhiah tawh chu an rawh zui ve leh ta chiah.

Thawhlehni tlai inkhelah Kanan chuan Bungkawn lakah 3-0 (25-14, 25-16, 25-20) in hnehna an chang a, hmeichhe lamah semifinal khel tur a chiang kim tawh. Kanan, Luangmual, Bethlehem Vengthlang leh Bungkawn ten final khel tur an zawng ang.