2022-23 season-a goal khung tam ber Haaland

Euro 2024 qualifier-ah Norway-in Cyprus 3-1 in an hneh a, Thawhlehni zan inkhelah hian Erling Haaland-a'n goal hnih a khung. Norwegian striker Haaland hian tun season-ah club leh ram tan goal 56 a khung a, Manchester City striker hi 2022-23 season-a goal khung tam ber a ni.

Goal khung khawl

Kum 22 mi Haaland hian nikum May 10 khan pound maktaduai 51.2-in Man City a zawm a, English club tan hian season hmasa berah goal 52 a khung nghal.

Norwegian striker Haaland hian goal a khung a ni ringawt lo a, City hi an la champion ngai lohna UEFA Champions League-ah a champion pui - hei ringawt pawh hi a ropui. City hian Premier League leh FA Cup-ah an champion a, an treble champion bawk.

Haaland hian inhliam vangin March thlaa international break-ah a inlan thei lo. Tun ṭumah erawh Haaland hi Norway tan inlan thei a, match hnihah goal thum a khung.

Cyprus lakah hian penalty aṭanga a khung bakah Arsenal captain Martin Odegaard siamsak chu a goal thum nan a khung leh bawk.

Ballon d'Or?

Haaland hi ballon d'Or dawng thei tur hiala sawi a ni a, mah se season tawp lam a hmang ṭha tawk lo. Norwegian striker hian FA Cup leh Champions League final-ah goal a khung lo.

Ballon d'Or dawng thei tura buk rit dang Lionel Messi-a'n season tawp lam hmang ṭha bik lo mah se FIFA World Cup nomawi a chawi. Haaland-a vanduaina belchhah turin UCL player of the season-a a khelhpui Rodri thlan a ni a, Spanish midfielder hian La Roja chu Nations League-ah champion puiin best player-ah thlan a ni.

Hemi a nih avang hian Haaland hi ballon d'Or dawng tura buk rit ber a ni tawh lo a, a vanduai a nih chuan pahnihna pawh ni lo thei dinhmunah ding.

Engtin zel?

Norway-in Euro 2000 hnuah inelna lian thamah an la tel pha leh lo a, World Cup hnuhnung berah pawh Haaland telna Norway an tel pha lo.

Euro 2024 khel tur zawnnaah pawh Norway hi an che ṭha chuang lo. March thla khan Haaland-a tel loin Spain an hneh lo a, Georgia nen 1-1 in an inhnehtawk. Haaland awm hnuah an mualah Scotland an hneh lo a, Cyprus hneh mah se an group-ah Spain an awm ve bawk avangin Germany-a zin theihna ticket neih hi a harsa khawp ang.