Rank 171-nain Lewy telna Poland an hneh

FIFA ranking-ah India 101-naah an awm mek a, Hamara Desh hnuai daiha awm ranking-a 171-na Moldova-in FIFA World Cup khel pha Poland 3-2 in an hneh. Poland hian World Cup hnuhnung pahnih bakah Euro C'ship hnuhnung pali an khel thei a, an player chhuanvawr Robert Lewandowski tel chungin Moldova hi an hneh lo.

Zimbru Stadium, Chisinau-ah mikhual team an che ṭha a, Arkadiusz Milik leh Robert Lewandowski te hmangin goal an khung. First half-ah Poland 2-0 in hma an hruai a, chak mai tura ngaih an ni.

Mahse, second half-ah Moldova tan Ion Nicolaescu-a'n goal hnih khungin siphurh a sut zo a, minute 85-naah defender Vladyslav Baboglo-a'n chakna goal a khung.

Portugal coach hlui Fernando Santos hnuaiah Poland-in match thumah point thum chauh an hmu a, Euro 2022 khel turin insiamṭhat ran a ṭul ang.