Belgium striker Lukaku ke a hmui

Thawhlehni zan khan Belgium-in Estonia 3-0 in an hneh a, Romelu Lukaku-a'n goal hnih a khung. Belgian striker Lukaku hian qualifying match-ah a zawnin match 15 chhung goal a khung tawh a, kum ruk dawn chu qualifying match apiangin goal a khung tihna a ni.

Belgium tan hian Lukaku hian Kevin de Bruyne awm loh avangin captain armband a hreng a, goal hmasa pahnih a khung. Goal thumna hi minute 90-naah Johan Bakayoko a khung a, A. Le Coq Arena-ah mualeitu Estonia 3-0 in an hneh.

Kum 30 mi Lukaku hian season tawp lam a hmang ṭha a, league match 25-ah goal 10 khung mah se a tawp a khar ṭha lo. UCL final-ah Lukaku hian chance ṭha bik a hlah avangin Inter Milan-in nomawi an chan a, Chelsea aṭanga loan hmanga a khelhna Nerazzurri-ah a cham zel ang tih pawh a chiang lo.

Inkhelh hma hian Belgium team chhung boruak a ṭha lo. Coach thar Domenico Tedesco leh veteran goalkeeper Thibaut Cortouis te an inti thiam lo. Inhliam vangin KDB a tel thei lo a, Lukaku-a'n captain hna a chelh hi Cortouis-a'n hrethiam lo a, team a chhuahsan niin coach Tedesco-a'n a sawi.

Mahse, Courtois erawh coach thusawi danah a thinur. Real Madrid goalkeeper hian khum hliam vangin doctor a hmu a, Estonia a chhawn thei lo niin a insawifiah thung.