Euro 2024 thlengtu tur Germany an tlawm

Hansi Flick hnuaia indinthar tum Germany-in insiamṭhat aiin tlak hniam lam an pan zel. Germany hian an match hnuhnung pangaah chak an nei lo a, an vanneihna erawh Euro 2024 thlengtu tur an nih avangin qualifier khelh ve a ngai ve lo.

Thawhlehni zan khan Veltins-Arena-ah Germany-in Colombia an mikhual a, 2-0 in an chak lo. Mikhual team tan Luis Dias leh Juan Cuadrado ten second half-ah an khung.

Germany hian Colombia an hneh loh hma hian Poland lakah an tlawm a, an mualah Ukraine an draw hram. Kumin March thla khan Peru leh Belgium an hneh lo bawk. Hei chauh hi a ni lo, Hansi Flick-a hote hian nikum kum tawp khan World Cup-ah group stage an paltlang zo lo bawk.

Bayern Munich midfielder Leon Goretzka chuan, "Sawifiah thiam chi pawh a ni lo. Engkim kan hloh vek ni berin ka hria. Season tawp lama Bayern hun hman ang deuh kha a ni a, kan vanduai a kaltluang a ni," tiin a sawi.

Colombia lakah hian Germany-in tlarhnungah defender pathum an dah chhin a, a hlawhtling lo. Flick chuan, "Thil thar tih kan tum a, a fuh lo," tiin a sawi. Chutihrualin Germany hian insiamṭhatna tur hun an la ngah a, an tih fuh loh hriat hma hi vanneihna a ni thei bawk. Kumin September thla hian World Cup-a an hneh loh Japan an hmachhawn dawn.