Scotland an che ṭha zel

Scotland-in Euro 2024 qualifier match li an khelh tawhah an la chak vek. Thawhlehni zan inkhelah Callum McGregor leh Scott McTominay te goal hmangin Scotland hian Georgia 2-0 in an hneh.

Steve Clarke-a kaihhruai team hian point 12 an hmu tawh a, anmahni hnaih bertu Georgia leh Norway aiin point riatin an hmu tam zawk. Chutihrualin team ṭha ber tura ngaih Spain-in Nations League final an khelh avangin match hnih chauh an la khel tih hriat a ṭha.

Hampden Park-a inkhelah Scotland-in bul an ṭan ṭha a, minute rukna lekah Celtic midfielder McGregor-a'n corner aṭanga ball per chhuak chu ṭha zetin a pet goal.

Ruahsur vangin halftime-ah hun rei tak chawlh a ni a, Georgia ṭantute an thinur hle. Second half an ṭan a, Scotland bawkin bul an ṭan ṭha. Manchester United midfielder McTominay-a'n box chhung vel chiah aṭangin a pet goal. McTominay hian qualifier-ah goal nga ngawt a khung tawh!

Injury time-ah ball-in Aaron Hickey kut a per avangin Gerogia-in penalty an hmu a, an chhuanvawr Khvicha Kvaratskhelia rawn pen chhuak Serie A-a Napoli champion puitu hian goal pawnah a pet thlawk luah.

Scotland an chak a, inelna a zawna Euro C'ship khel thei dinhmunah an ding mek. Steve Clarke-a hote hi Andrew Robertson (captain), Kieran Tierney, Billy Gilmour, John McGinn leh McTominay te an nih nawk avangin Euro 2024 khel tura an tling a nih pawhin thilmak a ni lo.