Brazil ngam loh Sadio Mane

Senegal chuan football ram ropui Brazil chu international friendly match-ah 4-2 in an hneh a, Bayern Munich forward Sadio Mane chuan goal hnih a khung.

Lisbon khawpuia inkhelah Brazil-in Lucas Paqueta hmangin goal an khung hmasa zawk a, mahse, West Ham midfielder goal khung hi Habib Diallo, Marquinhos (own goal) leh Sadio Mane hmangin an chhang let.

Brazil-in an inrin hmain goal thum an chhuah a, an insiamrem hman lo. Minute 58-naah Marquinhos a inlar a, Paris St-Germain defender hian a tihsual thup mawi nan si phurh a sut ṭhen.

Selecao hi phur thar viau mah se a pawimawh ber goal an khung thei lo a, a tawpah Senegal-in an hrem - hun pek belh minute sarihnaah Liverpool forward hlui hian a khung leh a, 4-2 in an ram team hi a chakpui.

Brazil an buai

World Cup 2022 quarterfinal aṭanga an tlak hnuah Brazil-in match thum an khel leh tawh a, vawi khat chiah an la chak - Morocco lakah 2-1 in an tlawm tawh a, an chak awmchhun chu 4-1 a Guinea an hneh chu a ni.

Brazil hian coach Tite ban hnuah coach thar an la nei leh rih lo a, Under-20 manager Ramon Menezes chuan senior team a enkawl rih - result a neih ṭhatpui thei lo a, coach thar an mamawh.

Football ram ropui Brazil hian Real Madrid manager Carlo Ancelotti chu an coach ni turin an la beisei reng nia sawi a ni a, khawthlang media ṭhenkhat chuan an inrem tawh niin an tarlang hial.

Mahse, Ancelotti hian July 1, 2024 thleng Real-ah contract a la nei a, a contract hman zawhah Brazil hi a zawm dawn niin an sawi - hei hi thutak a nih chuan Brazil hian coach lailawk tur an melh a ṭul dawn, tihna a ni.

Inkhel dang

International friendly match inkhel ngaihven hlawh dangah Uruguay chuan 2-0 in Cuba an hneh a, Facunda Torres (penalty) leh Maximiliano Araujo ten goal khat ve ve an khung.

Asian football powerhouse tia hriat lar Japan chuan 4-1 in Peru an sawp a, VfB Stuggart defender Hiroki Ito, Brighton & Hove Albion winger Kaoru Mitoma, Ligue 1 club Reims winger Junya Ito leh Celtic winger Daizen Maeda ten goal khat ṭheuh an khung.

Peru tan Saudi club Al-Adalah midfielder Christofer Gonzáles chuan goal khat khung ve mah se awmzia a nei phak lo a, kum 30 mi forward-in minute 83-naa goal a khung hian Japan lam chuan goal li an khung daih tawh.

Hetihlai hian Asian football-a ngaihven hlawh South Korea chu El Salvador nen 1-1 in an inhnehtawk - South Korea tan Hwang Ui-Jo chuan minute 49-naah goal hmahruai a khung a, mahse, El Salvador tan MLS club Seattle Sounders FC right back Alex Roldán chuan si phurh a sut a ni.