Champion rinkai Bayern-in Blues an sawp

Bayern Munich-in Stamford Bridge-a 3-0 a an hneh tawh Chelsea an mikhual a, Allianz Arena-ah 4-1 a sawp nawnin aggregate-ah German champion 7-1 in an chak. Hansi Flick-a hote hian Champions League quarterfinal-ah Barcelona an hmachhawn ang.

Bavarians tan Robert Lewandowski-a'n goal hnih a khung a, Ivan Perisic leh Corentin Tolisso ten goal khat ve ve an khung. Chelsea goal awmchhun hi Tammy Abraham-a'n a khung a, Frank Lampard-a hote Champions League beiseina a tawp tak avangin season thar ṭan hmain hahdamna hun ṭha an nei thei ang. 

Bayern Munich-in German football an thunun a, Bundesliga leh DFB-Pokal ah an champion. Hansi Flick hnuaiah team boruak a ṭha a, inrintawkna an ngah. Bundesliga an zawh hma avangin hahdamna hun ṭha an nei a, Chelsea nena inkhel tur hian an inpeih hle.

Chelsea erawh Premier League-a palina ni turin season tawp thlengin an theihna zawng zawng an sen a ṭul a, FA Cup final-ah Arsenal lakah an chak lo. An inkhelh tam avangin player inhliam an ngah - Willian, Ruben Loftus-Cheek, Billy Gilmour, Cesar Azpilicueta, Christian Pulisic leh Pedro te hliam vangin chhawr theih an ni lo.

Minute 90 khelh tur a la awm avangin Blues tan thilmak a beisei theih a, amaherawhchu thil awm dan tak hmu thiam chin tan chuan Frank Lampard hote tan Bayern lakah thawh chhuah ngaihna a awm tawh lo - inkhel awmze nei lo tih hiala sawi theih a ni.

Bayern-in goal khung turin hun rei an mamawh lo a, minute 10-na lekah Robert Lewandowski-a'n a penalty hlawhchhuah chu goal-ah a chantir. Polish striker hi penalty box-ah a tlangnel chhunzawm a, minute 24-naah fing takin Ivan Perisic hnenah ball ṭha a pe a, Croatian winger hian goal-ah a chantir.

Aggregate-ah 5-0 a nih tak avangin Chelsea tan beisei a bo. Mualpho hliah khuhna tura Callum Hudson-Odoi-a goal chu offiside vangin pawm a ni lo a, amaherawhchu Bayern keeper Manuel Neuer tih 

ṭhat tawk loh zarah Tammy Abraham-a'n minute 44-naah siphurh a sut ṭhen.

Second half-ah Bayern bawk an langsar a, minute 76-naah Lewandowski-a ball cross chu substitute  Corentin Tolisso-a'n goal-ah a chantir. Minute 83-naah Lewandowski-a'n sang taka zuangin Alvaro Odriozola cross chu a tauh lut. Allianz Arena-ah Bayern Munich 4-1 in an chak a, aggregate-ah 7-1 in hnehna an chang.

Bayern boss Hansi Flick-a'n right back-ah inhliam Benjamin Pavard aiah Joshua Kimmich a dah a, German player hi thla riat chhunga vawi hnih right back hna a chelhna chauh a nih avangin a goal nawr a na tawk lo.  Kimmich hi midfield-ah a ṭangkai zawk tih a lang a, chutihrualin Pavard hi a dam hman lo a nih chuan right back hna a chelh chhunzawm a ngai ang.

Midfield-ah Thiago Alacantara awmin Spanish midfielder hian tlarhnung a puih ṭhat bakah tlarhma lamah pawh a ṭangkai a, a kawppui Leon Goretzka aiin nasa takin a langsar zawk. Bavarians 

ṭantuten nipui transfer-a chhuak tura sawi Thiago hi cham turin an duh thar leh ang. Chelsea lakah Bayern che ṭha viau mah se tlarhnung erawh a phui lo tih a lang a, team lian zawk Barcelona, Manchester City, Paris St Germain emaw Atletico Madrid hmachhawn tur chuan insiamṭhat an mamawh hle.

Tlarhmaah erawh Robert Lewandowski an kawl miau avangin an ngaihtuahawm lo. Polish striker Lewandowski hian tun season Champions League-a a inlanna inkhel Red Star Belgrade (1), Spurs (2), Olympiakos (2), Olympiakos (1), Red Star Belgrade (4), Chelesa (1) leh Chelsea (1) ah te goal khung vekin goal 12 a khung tawh.

Bayern Munich boss Hansi Flick chuan, "Kan chakna kan pho lang a, inkhel pawimawhah chuan kan theihna 100% kan pek hi a pawimawh hle," tiin an khelh danah a lungawi thu a sawi.

German manager Flick chuan, "Barcelona an nih avangin a danglam dawn lo. Kan khingpui dangte hmachhawn tura kan inbuatsaih dan thoin kan inbuatsaih dawn. Lione Messi chauh kan thlir dawn lo a, player zawng zawng kan thlir ang," tiin quarterfinal-a an hmachhawn tur Barcelona chungchang a sawi.

Chelsea boss Frank Lampard chuan, "Tun ang zan hian thil tam tak min hmuhtir a, thil tam tak min hrilh bawk. Football aṭanga thlir chuan kan hmasawnna lai tur ka hriat phah a, chumi lai chu ka ngaihtuah chhunzawm ang. Kan team-ah hian thil ṭha tam tak ka hmu a, a ṭha lo pawh a awm ve bawk. Inelna sang chinah chuan tihsual a pawi a, kan tihsuala min hrem a nih chuan thawhchhuah ngaihna a awm tawh lo. Tun aia ṭhaa season hman kan duh a, chutihrualin kan thlen chinah hian lungawina tur a awm. Kan khelh hmabak atana hmasawn tum hi kan tih tur chu a ni," tiin season thara team ṭha zawk din a tum thu a sawi.

Blues hi season ṭanna inkhelah Manchester United lakah 4-0 in an tlawm a, hemi hnu hian insiamṭhain Premier League-ah palina niin season tharah Champions League an khel dawn. FA Cup final-ah Blues hian Arsenal hneh lo mah se Frank Lampard-a'n nipui transfer-ah player a lalut thei lo tih hriat a ṭha a, chuti chunga an thlen chin hi a chhuanawm hle. Season thar atan Chelsea-in Hakim Ziyech leh Timo Werner te an lalut tawh a, season thar atan London club ṭha zawk din tumin hma an la mek.