Match hmasa berah Murray a chak lo

Wimbledon inbuatsaihna zinga mi Queen’s Club Championship-ah Andy Murray chu hneh nei loin a tla, grass court inelna lian ber an khelh hunah seeded zingah a tel phak dawn lo tihna a ni.

Thawhlehni zan inkhelah Murray hian Alex de Minaur chu 6-3, 6-1 in a ngam lo, vawi nga a champion tawhna hmunah beisei nei sang viau mah se a duh ang result a hlawh chhuak thei lo.

World number 1 hlui Murray hian tun hnaiah Surbiton Trophy leh Nottingham Open nomawi te a chawi a, hun rei tak hnuah grass court season a hmang fuh hle, mahse atan chet ṭhat reng a harsa.

Kum 36 mi Murray chuan, "Player ṭha tak lakah ka chak lo a nimai a, thil mak tak a ni hran lo. Nottingham Open khelh zawh takah khan set hloh miah loin ka champion thei a, tunah erawh set ka la miah lo thung.

"Tournament zawng zawng khelh ṭhat vek theih a ni bik lo, ka chak lohna hi insiamṭhat nan hman ka tum ang," a ti. Tun dinhmunah Murray hi world number 38 a ni mek, inelna lian Grand Slam-ah hian player 32 chinin seeded an chang ṭhin.

Inkhel dangah Carlos Alcaraz erawh a chak. Spanish star hian set a hloh hmasak zet hnuah Arthur Rinderknech chu 4-6, 7-5, 7-6 (3) in a hneh. World number 83 Rinderknech hi Arthur Fils a inhnuhdawh leh thut vanga tel thei chauh a ni.

World number 2 Alcaraz hian French Open semifinal-a Novak Djokovic a hneh loh hnua a inlan lehna hmasa a ni a, atan chuan hnehna chan hi thil lawmawm a ni ang. Inkhel dangah Frances Tiafoe chuan Botic van De Zandschulp chu 6-2, 6-4 in a hneh ve bawk.