Kante-a'n Al-Ittihad a zawm

Chelsea midfielder N'Golo Kante chuan Saudi Arabian champion Al-Ittihad a zawm fel ta a, tun thla tawpa Blues tana a contract zo mai tur pawhsei ai chuan sum tamna hmun a thlang ta zawk.

Kum 32 mi Kante hi sum leh hausakna lam ngaihtuah lo tia hriat hlawh a ni ṭhin. Al-Ittihad tan hian season li daih contract a ziak a, kum khatah euro maktaduai 25 zel a hlawh ang a, sumdawnna lam aṭangin lak belh tur a ni bawk ang.

France international midifielder Kante hi season hmasa khan hliam vangin a buai hle a, match kua chiah a inlan. London club hian cham rih turin an bia, mahse Stamford Bridge khawpui chhuahsan a thlang ta zawk.

Al-Ittihad hian Real Madrid striker leh an captain ni bawk Karim Benzema an la fel tawh a, kum thum chhung atan inremna an ziak - Saudi Arabian champion hian player langsar dang an la melh bawk niin an sawi.

Kante hian tawnhriat a nei ṭha - Leicester City tan Premier League nomawi a chawi a, chumi hnuah Chelsea panin Champions League, Premier League, Europa League leh FA Cup te a chawi leh vek bawk.

Saudi Arabia ramah hian Ballon d'Or vawi nga dawng tawh Cristiano Ronaldo chu kumin tir lam aṭang khan a lo khel tawh a, player langsar dang pawhin an la pan zel dawn niin a lang.

Lionel Messi pawh kal tur angin thawm a ring hman hle, mahse Argentina captain hian Inter Miami a zawm ta zawk. South Korea international Son Heung-min pawhin Saudi Arabia lam a hawi rih lo tih a sawi bawk.