Declan Rice lei dilna an hnawl nawn

Arsenal chuan Declan Rice lei dilna chu a vawi hnih nan an thehlut - mahse West Ham United chuan an captain lei dilna hi a vawi hnih nan an lo hnawlsak a, an hnawl chhan hi an beisei ang zat sum an la hmuh loh vang a ni.

England international midfielder Rice hi a chhuak duh tih chu a chiang tawh, a chenna London khawpui chhuahsan loa inkhelh chhunzawm erawh a duh. Tuna a lan dan chuan Gunners zawm a duh niin an sawi bawk.

Arsenal hian pound maktaduai 75 hum chungin a vawi hnih nan an dawr a, a man san chhoh theihna tur nen chuan pound maktaduai 90 vel bawr thleng thei tura ngaih a ni, mahse hei hi Hammers lungawi nan a la tawk zo lo.

Kum 24 mi Rice hian West Ham tan match 245 khelin goal 15 a khungsak tawh a, season liamta khan Europa Conference League nomawi a chawipui. A chawr chhuahna club chhuahsana chona thar hmachhawn a duh a ni.

Hammers chairman David Sullivan chuan Rice hi a chhuak dawn tih chu 99%-in a chiang tawh tiin a lo sawi tawh. Arsenal bakah hian Manchester City dawrna an la ngaichang tel niin a lang a, nipui bazat tir lam chauh a la nih avangin hun a la duh deuh dawn niin a lang.

Mikel Arteta-a'n a midfield siamṭhat a tum a, a neih sa Granit Xhaka chu a chhuak dawn tih a chiang tawh. Thomas Partey pawh a chhuah an phal a, ani chu chu Rice leh Xhaka te chungchang nen inzawmna a nei lo niin an sawi thung.

Chelsea aṭangin Kai Havertz lakluh tumin hma an la mek a, an dawrna hmasa chu hnawlsak an ni - an la dawr nawn leh ang. The Athletic lama Arsenal chanchin ziaktu David Ornstein sawi dan chuan - Partey hi a chhuak a nih chuan a thlak nan Moises Caicedo emaw Romeo Lavia emaw an dawr ang.