Zidane Iqbal-a'n Utrecht pan dawn

Manchester United rawlthar duhawm Zidane Iqbal chuan Dutch club Utrecht a zawm dawn a, kum li daih contract a ang. Kum 20 mi Zidane hian nimin khan medical a nei a, he thu i chhiar meuh chuan a chiang tawh ang.

Zidane Iqbal hi theihna sang taka ngaih ni mah se a man chungchanga Utrecht leh Man United inremna hi a khelh ṭhat dan a zira euro maktaduai khata (£856,000) pung chho thei chauh a ni.

Chutihrualin an inremnaah Utrecht hian Iqbal hi an hralh a nih chuan Man United-in a hlawkna la chang thei dawn. United academy chhuak Zidane Iqbal hian first team tan vawi khat chauh a inlan a, December 2021 khan bench aṭanga lutin Young Boys a hmachhawn. An ram Iraq tan match thum a khel tawh bawk.