Europa League - Mini Tournament khelh ṭan a ni dawn Inter Vs Leverkusen; Man United Vs Copenhagen

Eruopa League-ah team pariat chiah an dam tawh a, inelna hi knockout hmangin Germany-ah khelh a ni dawn. Zanin dar 12:30 hian Dusseldorf-ah Inter Milan leh Bayer Leverkusen an inhmachhawn ang a, Cologne-ah Manchester United leh Copenhagen te an inkhel bawk ang.

Inter Milan hi UEFA Cup-ah vawi thum an champion tawh a, Bayer Leverkusen hi UEFA Cup-ah vawi khat an champion ve tawh bawk.

Italian club hian Champions League group stage-ah Barcelona leh Borussia Dortmund te an tluk loh avangin Europa League an khel a, quarterfinal thleng tur hian Ludogorets leh Getafe te an hneh.

German club Bayer Leverkusen pawh hi Champions League aṭanga tla thla tho an ni a, Juventus leh Atletico Madrid te hnuaiah an awm. Europa League-ah FC Porto leh Rangers te an hneh a, Bundesliga-ah pangana ni mah se Serie A pahnihna Inter Milan el pha tur an ni.

Alexis Sanchez-a'n a nghetin Serie A club a zawm tak avangin Bayer Leverkusen an hmachhawn hunah chuan Chilean forward hi Inter Milan player tak tak a ni tawh dawn. Nerazzurri-in Getafe an hneh ṭum khan Alexis hi bench aṭangin a lut a, Leverkusen lakah first eleven a chan loh pawhin khelhna hun pek a ni ang.

Sanchez hian Serie A khelh zawh takah match 22-ah inlanin goal li a khung a, Europa League-ah goal a la khung lo. Inter hian tlarhmaah Romelu Lukaku leh Lautaro Martinez te an kawl a, Europe-a striker inkawp hlauhawm ber zinga mi an ni. 

Inter hian Tottenham player hlui Christian Eriksen pawh an kawl a, amaherawhchu Danish midfielder Eriksen hian Antonio Conte hnuaiah khelhna hmun chan a harsat. Chutihrualin kum 28 mi Eriksen hi Getafe nen an inkhelh ṭumin bench aṭanga lutin a pet goal a, a la thiam reng tih erawh a chiang hle.

Bayer Leverkusen-in DFB Pokal final an thleng a, Bayern Munich an hneh lo. Bundesliga club ṭha zinga chhiar tel an ni a; Kevin Volland, Kai Havertz, Sven Bender leh Leon Bailey te awmna team a ni.

Europa League mini tournament hi Germany-ah khelh a nih avangin German club Leverkusen tan nomawi chawi theihna hun ṭha a ni a, an tum ram thleng turin player ṭha an nei bawk.

Chelsea nena sawi zawm Kai Havertz-a'n Bayer Leverkusen-ah hmun pawimawh a chang a, kum 21 mi Havertz hian tun season inelna hrang hrangah goal 17 a khung a, midfielder goal khung thei ta ka ni. London club ṭantute tan Havertz-a hi inkhel en phahna tham a tling.

Manchester United-in LASK an hmachhawn ṭumin team ṭha ber an luhtir lo a, Ole Gunnar Solskjaer-a'n Copenhagen an hmachhawn hunah player a thlak danglam tur thu a sawi.

LASK laka bench-a ṭhu David de Gea, Victor Lindelof, Aaron Wan-Bissaka, Paul Pogba, Bruno Fernandes, Marcus Rashford, Mason Greenwood leh Anthony Martial ten bul an ṭan vek a rinawm. Chutihrualin heng zinga mi pahnih khat hi bench-ah an awm ve thei bawk.

FC Copenhagen boss Stale Solbakken hi Solskjaer ṭhian ṭha a ni. Norwegian manager Solskjaer chuan, "Stale hi ka hre ṭha a, ka ṭhian ṭha tak a ni. Kum 2011 khan pro license kha Copenhagen-ah amah nen kan tidun a, chuvangin amaha hriat tur pawimawh chu ka hre turah ka ngai. Chutiang bawkin amah pawhin min hria ang," tiin an khingpui tur chungchang a sawi.

Copenhagen hian quarterfinal thleng turin Turkish champion Istanbul Basaksehir an lehthal a, khualmualah 1-0 a an chak loh hnuin an mualah 3-0 in an chak. Danish club tan hian Jonas Wind-a'n goal hnih a khung a, Rasmus Falk-a'n goal khat a khung ve bawk.

Basaksehir an hmachhawn ṭum hian Copenhagen an khel ṭha a, Manchester United tan pawh buaina tham an tling ang. Danish club hi rinkai lo zawk an ni a, pressure an nei dawn lo - neutral ground-a khelh tur a nih bawk avangin English club tan ngaihṭha taka awm a rem lo.