Tennis inkhel entu tam ber

Roger Federer leh Rafael Nadal te chuan Zirtawpni zan khan charity match an khel a, a hmunah mipui 51,954 zetin an en - tennis match a hmuna entu tam ber record an siam.

Tennis stadium hi lian taka sak a ni ngai lem lo, tun ṭuma legend pahnih inkhelhna erawh football khelh nana hman ṭhin Cape Town Stadium a nih avangin mipui an leng hnem. Inkhelah hian Grand Slam vawi 20 champion tawh Federer-a'n 6-4, 3-6, 6-3 in hnehna a chang.

Nikum November thla khan Mexico-ah player ropui pahnih hi an intawng a, entu 42,217 neiin entu tam record an lo siam tawh; tun ṭumah hian an record hmasa chu an rawn khum ta chiah.

Nadal leh Federer te hi court chhungah inel mah se ṭhian ṭha tak an ni. Swiss star chuan, "Rafa-a'n ti hian min hrilh, 2009 French Open ka champion vang khan a ṭap, min lawmpui vanga ṭap a ni," tiin a elpui Federer-a'n clay court inelna liana a vawi khat nana hlawhtlinna a chang chu a lawmpui thu a sawi.

Charity match hi Federer foundation lamin Microsoft neitu Bill Gates te nen ṭangkawpa an buatsaih a ni a, doubles match an khel bawk. Federer leh Gates 

ṭangdunin Nadal leh South Africa rama Daily Show host Trevor Noah te an ṭangdun ve thung a, Nadal te hian hnehna an chang.

Grand Slam vawi 19 champion tawh Nadal chuan, "Federer leh an chhungkua ina thil an tih hi a ropui a, midang ṭanpui nana ke an pen ṭhin hi ka thlawp hle, an thil tih tihlawhtling theitu zinga ka tel hi a lawmawm. Mipui tam tak hmaa inkhel kan nih avangin he match hi hriatreng a ni tawh ang," a ti.

Federer leh Nadal te hi Australian Open khel zo hlim an ni, tunah chuan clay court inelna hmachhawn turin an inbuatsaih chhunzawm ang. Clay court inelna lian ber French Open 2020 chu May thla tawp lamah khelh tur a ni dawn.