India international hlui Manitombi a thi

Manipur footballer lar leh India tan pawha lo inlan tawh  Manitombi Singh chu nimin khan kum 39 mi niin a thi a, right back leh midfield-a khel kawp thei player hi a thih chhan tak puanzar a ni lo. 

Air India, Salgaocar FC leh Mohun Bagan tan pawha lo khel tawh defender hi kum 2002-a India Under 23-in LG Cup nomawi an chawi khan team-ah a tel - inelna thlengtu Vietnam hneha champion India-in kum 1972 (SAFF tel loin) hnua international nomawi an chawi leh hmasak ber a ni. 

Asian Games thlenga India aiawha lo inlan tawh Manipur player hi Mohun Bagan fan-te ngainat rawn a ni a, club captain dinhmun hial chelh phakin kum 2004 khan a kaihhruaina hnuaiah Kolkata club lian hian All Airlines Gold Cup-ah champion nomawi an chawi. 

Manitombi hi kum 2012 hnu khan an ram, Manipur lamah kirin Neroca tan a khel a, kum 2012 khan an club chanchina a vawi khat nan Manipur State League-ah a champion pui. Neroca-a chhuahsan hnuah Anouba Imagi Mangal (AIM) a zawm a, 2015-16 season a khelhsak - inkhelh a chawlhsan hnuah AIM-ah hian coach a ni zui.