Bertens leh Svitolina inhnukdawk

Hmeichhe tennis world number 5 Elina Svitolina leh world number 7 Kiki Bertens te chu US Open khelh tur aṭangin an inhnukdawk, world number 1 Ashleigh Barty chuan a tel loh tur thu a lo sawi chiang 

tawh bawk.

Season hmasa semifinalist, Ukraine nula Svitolina chuan, "Tunah chuan US pan turin ka rilru ala inpeih lo, kei leh ka team hi dinhmun derthawng taka awmtir ka duh lo," tiin hard court inelna lian a hmachhawn loh tur thu a sawi.

Netherlands chuan US aṭanga an rama zin leh haw zawng zawngte chu chawlh kar hnih chhung an khung hrang vek a, an ram inkaihhruaina vangin Dutch nula Bertens chuan New York khawpui a pan dawn lo.

Barty, Bertens leh Svitolina te an inhnukdawk a, Romanian nula Simana Halep pawhin a dinhmun a chian loh thu a sawi. American nula Serena Williams erawhin US Open leh French Open khelh ngei a tum thu a sawi ve thung.

Grand Slam vawi 23 champion tawh Serena chuan, "Inelna lian pahnih hmachhawn theih ka inring, chumi tur chuan ka thawkrim hle bawk. Hri leng karah pawh ni se inkhelh ka duh a, mahse eng emaw palh a thleng a nih chuan tournament aiin hriselna kan ngai pawimawh zawk tur a ni ang," a ti.

Mipa lamah Roger Federer chu hliam vangin a inlan dawn lo chiang a, world number 2 Rafael Nadal a inhnukdawk tawh. World number 1 Novak Djokovic erawhin inlan tumin a hming a pe lut.