TNT an chak fai vek

Dan theih lohin Thutak Nunpuitu Team (TNT) an kal fawr chhunzawm zel - Muanna Veng team hian Nilaini zan khan Hunthar chu 3-1 (26-24, 25-17, 20-25, 25-22) in an hneh a, tun season Tata SK 712 Pro Volleyball League-ah match nga khel tawhin an chak fai vek.

R. Dengṭhuama Indoor Stadium, Mualpuia inkhelah TNT tan net bula Hunthar lam vuak thlak tur lo dansak thei em emtu Zosangzuala (Mama) chu a vawi khat nan D3 Business Player of the Match atan thlan a ni, point 16 hmuin ṭum li a hloh thung.

Team pahnih hi semifinal lut chiang tawhsa an ni a, mahse tualchhung volleyball team ṭha pahnih leh ṭantu ngah an nih avangin a tir aṭanga a tawp thlengin an inkhel a hmuhnawm tluan chhuak.

PVL-ah hian Mizo hlanga khel chunga champion thei an la awm ngai lo. TNT hian team dang zawng zawngin an la tih theih ngai loh hi tih an tum mek - Vanlalṭanchhana (Valbuanga) an neih avangin theih loh tur niin a lang lo.

An chak vek avangin TNT hi a chung berah an awm chiang, nizan khan Tuipuiral leh Tuichangral ten semifinal hmunruak pakhat an inchuh a, a chak zawk chuan hmahruaitu TNT an hmachhawn a ngai dawn a ni.

Zanin dar 8:00 hian Chhinga Veng Spikers leh Hunthar ten league round kharna match an khel ang. Team pahnih te hi pahnihna leh pathumnaah an awm dawn tih a chiang tawh bawk a, chuvangin semifinal-ah pawh an inkhel dawn - zanin hi an tan inenchhinna ṭha a ni dawn.

Hmeichhe inelna lamah beisei nei tawh lo pahnih Power Department Sporting Club leh Durtlang an inkhel a, tun hma lama team ṭha ni ṭhin Power hi 3-0 (25-8, 25-18, 25-22) in an chak a, tun PVL bika an chak awmchhun niin Durtlang erawhin chak ni hmel an hmu lo.