Manchester City leh Pep Guardiola tan chona thar: Ilkay Gundogan - OUT; Mateo Kovacic - IN

Premier League champion lai Manchester City-in a zawna vawi li champion turin chona thar hautak an hmachhawn. Pep Guardiola-a'n Premier League bakah Champions League nomawi humhim a tum dawn a, an player pawimawh leh captain Ilkay Gundogan-a tel loin chona thar hi a hmachhawn a ṭul dawn. Gundogan hian Barcelona a pan dawn a, City hian Chelsea aṭangin pound maktaduai 30 velin Mateo Kovacic an lalut thung ang.

Mangṭha Gundogan

Tun thla tawp rualin Ilkay Gundogan contract a tawp dawn a, Man City hian kum 32 mi Germany international midfielder hi contract thar an zawrh. Amaherawhchu, Spanish champion Barcelona hian kum thum chhung atan sum ṭhahnem zawkin an thlem a, Gundogan-a'n Etihad Stadium a chhuahsan dawn.

Gundogan hian season liam ta khan match 51 a khel a, goal 11 a khung satliah lo - FA Cup final-a Manchester Untied laka goal hnih kha a khung ve ve a ni. Pep Guardiola pawhin Gundogan hi chelh ngei a duh a, Spanish manager ropui meuh pawhin a hmin thei ta bik lo.

Kum 2016 khan Gundogan hian Borussia Dortmund aṭangin Man City hi pound maktaduai 20-in a zawm a, English club tan match 304 khel tawhin goal 60 a khung. Eithad Stadium-a kum sarih chhung awmin nomawi 14 a chawi a, chungte chu Premier League nomawi panga, UCL pakhat, FA Cup pahnih, League Cup pali leh Community Shield pahnih te a ni.

Brazilian midfielder Fernandinho-a'n City a chhuahsan khan Gundogan hi captain atan ruat a ni a, 2022-23 season ṭantirh aṭang khan captain hna hi a chelh a ni.

City legend

Man City hian Gundogan hi chelh an duh ngei a, chutihrualin an ṭang na tawk lo. English club hian kum khat chauh contract an zawrh a, a chet ṭhat dan a zira kum khat dang pawtsei leh theih tur a ni. Barcelona erawhin kum hnih bakah kum khat dang pawhsei dan a awm.

Kum 32 mi Gundogan hian season ṭha tak a hmang zo a, mahse hmasawnna tur dang a ngah tawh lo. Germany international midfielder hmunruak hi a zau ngei dawn a, Pep leh City tana khel duh player ṭha an tam dawn avangin thlak harsa a kher lo ang. Kovacic pawh hi a ṭha tawk viau thei bawk.

Engpawh chu nise Gundogan hi City ṭantute zingah pawh a tla na a, record duhawm tak a neih bawk avangin club legend dang David Silva, Yaya Toure leh Vincent Kompany te huangah a awm thei hial ang.

City lawmna Kovacic

Chelsea-in mamawh ai tam player an lalut a, an ṭhat dan ber an hre lo. London club hian loh theih loin an inṭhuah fai a ngai a, Pep Guardiola leh a hoten remchangah an la thung.

City-in pound maktaduai 25 lekin Kovacic an lalut dawn a, a man hi pound maktaduai ngaah a la pung thei bawk. Croatian midfielder hi kum 29 mi a ni a, tawnhriat pawh a nei ṭha.

Kovacic hian Real Madrid tana khelh laiin Champions League nomawi vawi thum a chawi thei a, Chelsea tana a khelh hnuah Champions League leh Europa League a chawi leh bawk. Ram tan pawh Kovacic hian sulhnu ṭha tak a nei a, match 95 khel tawhin 2022 World Cup-a pathumna an nih khan match tinah bul a ṭan vek.

Engtin zel?

Pep leh City tan Gundogan-a chhuak tur hi buaina tham a tling lo a, Kovacic an lakluh nghal dawn avangin an thin phu pawh a rang kher lo ang. Chutihrualin Gundogan-a'n match 557-a goal 110 a khung theih laiin Kovacic-a'n match 491 aṭangin goal 24 chauh a khung tih hriat a ṭha.

City hian buaina tur dang pawh an nei. England defender Kyle Walker-a'n chhuah a duh nia sawi a awm a, treble champion-na kawngah Walker hian hmun pawimawh ber a chhang pha lo. Chutihrualin Real Madrid nena a khelh dan thlir chuan Walker chhuak hi channa lian tak a ni dawn a, a thlaktu tur chu John Stones a ni ang a, Rico Lewis chu Stones-a thachhangdawltu a ni thei ang.

Spain defender Aymeric Laporte pawhin hmun pawimawh a chang pha tawh lo a, inelna hrang hrangah match 24 chauh a khel. Pound maktaduai 57-a an lakluh Laporte hi a chhuak a nih pawhin City tan buaina tur a tam lo thung. Ruben Dias, Nathan Ake, Manuel Akanji leh Stones ten a hmunruak an luah thei vek.

January thlaa loan-a chhuak Joao Cancelo hi Etihad Stadium-ah a rawn kir a rinawm lo a, Pep Guardiola nen an inhmu thiam lo tih hriat a ṭha bawk. Chutihrualin City-in full back lak tur an nei lo a nih chuan Cancelo an chelh mai pawh a ṭul thei bawk.

Kalvin Phillips hian season liam ta khan match 10 chiah bul a ṭan a, pound maktaduai 45-a Leeds United aṭanga City zawmtu England international midfielder hian chhuah a la tum lo. Kum 27 mi Kalvin Phillips tan Gundogan chhuak hi chanchin lawmawm a ni thei a, inkhelh hun tam zawk a neih theih phah ngei a rinawm.

Chhuak tur zingah Riyad Mahrez hming a ri tel a, Saudi Arabia lama kal turin an sawi. Algerian winger Mahrez hian FA Cup semifinal-ah Sheffield United an hneh ṭumin hattrick siam mah se final-ah a khel lo. Mahrez hi a chhuak a nih chuan Phil Foden leh Julian Alvarez ten khelhna hun an ngah phah ang.

Pep leh City hian treble champion nawn emaw quadruple champion emaw an tum a nih chuan tun aia an squad a chhah erawh a ṭul dawn a, Kovacic bakah hian player dang an lakluh ngei a rinawm hle.