Odegaard bula khel tur Havertz

Arsenal chuan Chelsea forward Kai Havertz an lei dawn tih a chiang tawh, a contract rei zawng tur hi hun rei tak atan tih bak erawh sawi theih a la ni lo a, German international manah hian Blues nen hian pound maktaduai 65 bawrin an inrem fel.

London club pahnih an inrem tawh a, tunah chuan mimal thil leh medical test chauh a hmabak tawh - chanchinbu i chhiar meuh chuan Gunners jersey a lo pawtparh hman tawh hial thei bawk.

Kum 24 mi Havertz hian 2020 khan Bayer Leverkusen aṭangin pound maktaduai 71 zetin Chelsea hi a zawm, season hmasa khan Blues tan inelna hrang hrangah match 47 khelin goal kua a khungsak a ni.

Chelsea an insingsa mek a, an player chhawr tawh loh tur an chhuah tir bakah an neih ṭhat ṭhenkhat pawh loh theih lohna avangin an chelh theih loh chen a awm niin a lang - Havertz bakah hian an chelh duh chungin N'Golo Kante a chhuak bawk.

Hetih lai hian Blues neitu lamin an player zingah kum hnih daih contract la nei chin chu chhuahtir an pawiti lo niin an sawi bawk - Havertz hian kum 2025 thleng daih contract a nei mek a, chelh ngei tumin an bei lo a ni thei bawk.

Havertz hi midfielder a ni bawk a, tuna Arsenal player leikhawm dan chhut chuan Mikel Arteta hian Martin Odegaard bulah a khelh tir a rinawm - Granit Xhaka hmunruak luahtu tur a ni thei ang.

Germany international hian ball sem bakah a khung pawh a thei viau, a goal khung zingah 2021 Champions League final-a Manchester City an hnehna goal awmchhun a hria, inkhel boruak sang leh level sang ber thlengin tawnhriat a nei ṭha.

A ṭul a nih chuan Havertz hi tlarhma laiah a chawr theih bawk - Gabriel Jesus aiah a chhawr theih tihna a ni a, chumai bakah Jesus hnung chiaha khel turin a hman theih bawk, coach Arteta-a'n hei hi a duh chhan niin an sawi.

Premier League champion ni phak ta chiah lo mah se Arsenal hian hun rei tak hnuah Champions League an khel dawn. European football inelna sang bera an inlan dawn avang hian player ṭha an hip niin a lang a, sum sen an hreh lo bawk.

Havertz chauh a ni lo, midfielder Declan Rice pawh an dawr mek. England international hi ṭum hnih an dawr tawh, an dawrna hnuhnung zawk hlutna hi pound maktaduai 90 a tling a, a aia tam zawkin an dawr leh ang.