Gyan-a'n inkhelh a chawlhsan

Ghana tana goal khung hnem ber Asamoah Gyan chuan football a chawlhsan thu a sawi. Ghannian khawpui Accra-ah Ivory Coast striker hlui Didier Drogba nen mipui hmaah an awm laiin a chawlh thu hi mittui nen a puang.

Kum 37 mi Gyan chuan, "Thutlukna siam harsa tak a ni a, a sawi chhuah pawh a harsa. Mahse, mi zawng zawng hriat tura sawi hun chu a ni ta," tiin a sawi, an ram Ghana tan match 109 a khelh aṭangin goal 51 a khungsak a ni.

Social media lamah thu ziak zuiin Gyan chuan, "Footballer zawng zawngin an chawlh thu hi an sawi chak loh berte zinga mi a ni ngei ang, amaherawhchu hunin a rawn ken tel a ni tih kan pawm a ngai tlat.

"Boot ka khai a, jersey ka phelh ta - football khelh ka chawlhsan. Hun hian kan beng bul hnaiah kan chawlh a hun thu hi min rawn hrilh ve mai a ni," tiin a sawi a, kum 20 chhung a khelh tawh football chawlhsan chu harsa a ti ve hle.

Gyan hian Africa Cup of Nations hi vawi sarih a khel a, kum 2008 khan pathumna dinhmun an luah. Kum 2010 leh 2015 khan final lut mah se, nomawi inchuhna inkhelah a chak lo zawkah an ṭang.

An ram tana goal khung hnem ber a ni satliah lo - African player zingah khawvela football inelna ngaihhlut ber FIFA World Cup-a goal khung hnem ber a ni a, ṭum ruk a khung a ni.