Pawi kan ti takzet a ni - Flick

Football ram ropui zinga mi Germany an chefuh thei lo a, match hnuhnung paliah chak an nei lo. Friendly match hnuhnung berah Colombia an hneh lo a, coach Hansi Flick-a'n a result ṭha lo chu pawi a tih thu a sawi.

Germany hian Euro 2024 a thleng dawn a, an rama nomawi chawi tur chuan hmabak an ngah hle. Flick-a hote hian Colombia an hneh loh hma hian Poland lakah an tlawm a, an mualah Ukraine an draw hram. Kumin March thla khan Belgium an hneh lo bawk.

Flick chuan, "Thil thar tih kan tum a, kan hlawhtling lo. Thahrui kan nei lo a, kan tlan thei lo. Player mimal tinin inrintawkna an neih a ngai a, an nei lo a ni. Training-a ṭha tak kan tih kha a takah kan ti thei lo. Defensive player panga an awm a, tumah khan kan khingpuite winger tibuai thei an awm lo," tiin a sawi a, an result ṭha lo chu pawi a tih thu a sawi.

Germany hi anmahni ṭantuten an au el hial. Hemi chungchang hi sawiin Flick chuan, "Fan-te chuan football hmuhnawm thlir an duh a, an duh ang an hmu lo. September thlaah chuan a danglam tawh ang a, team ṭha zawk in hmu ang," tiin a sawi.

Flick-a hote hian September thla hian FIFA World Cup-a an mualphona Japan an hmachhawn dawn a, Blue Samurai bakah hian team ṭha France an mikhual dawn bawk. Germany hian result ṭha an nei lo a nih chuan Flick hi ban theih dinhmunah an ding hial ang.