Newcastle-in Tonali la lut dawn

Newcastle United chuan Italy international Sandro Tonali chungchangah AC Milan nen inremna an nei hnai a, Magpies hian defensive midfielder Tonali hi euro maktaduai 70 bawr velin an lalut thei ang.

Eddie Howe-a hote hian season tharah Champions League an khel dawn a, squad inthuam chhah pawh an mamawh hle. Magpies hian forward, centre back leh full back te an la zawng mek bawk.

Kum 23 mi Tonali hi Brescia aṭanga inzir chhuak a ni a, kum 2019 aṭangin AC Milan tan khel ṭanin kum 2021-22-a Scudetto an chawina kawngah player pawimawh a ni.

Tonali hian Serie A-ah season hnuhnung pahnihah match 70 a khel thei a, ram tan vawi 14 a khel tawh a, Champions League-ah pawh tawnhriat a nei tawh. Tun thlaa neih tur Under-21 European Championship-ah Italy tan Tonali hi a captain dawn a, Newcastle indintharna kawngah player pawimawh ni thei turin theihna a nei a ni.

Newcastle hian Ruben Neves chu loan hmanga lakluh an tum. Tun nipui transfer-ah Neves hian Wolves aṭangin Al Hilal a zawm a, Saudi club leh Magpies neitute hi PIF ve ve a nih avangin Portuguese midfielder hi Premier League-ah a khel chhunzawm a nih pawhin a mak lo ang.