Bale hian hun ṭha a khawhral - Real Ex-President

Real Madrid president hlui Ramon Calderon chuan Santiago Bernabeu-a hmun chang lo Gareth Bale chuan a hun ṭha a khawhral mai maia a hriat thu a sawi a, Bale leh Real chu nipui transfer-a inchinfel dan ngaihtuah turin a rawn. 

Champions League last 16 second leg-a Manchester City an hneh lohna inkhelah pawh Bale hi a inlan lo a, Real manager Zinedine Zidane chuan squad-a a telh loh player hi, "Mimal tak pawhin inbiakna ka neihpui a, inkhelh a duh lo a ni," tiin a sawi. 

Bale hian City squad-a tel hi a duh lo ngei niin a lang a, Welsh forward hian khelmualah hun a hmang dawn chuang loa a hriat avangin inkhel lo tura Manchester khawpuia zin hi a duh lo a ni. 

Calderon chuan, "A pawi takzet a, ani ang player an awm mai mai hi a dik lo. Talent a la nei reng a, khawvela eng team tan pawha khel thei tur khawpin thiamna a la nei reng a ni. Bale leh Real hian an pahnih tana ṭha tur zawkin thutlukna an siam vat a ngai a ni," a ti. 

Bale hian Real tana khel turin kum hnih contract a la nei mek a, kar khatah £600,000 vel a hlawh nia sawi a nih avangin khawvel club dang zingah heti zat hlawh tir ngam hi an tam kher lo ang. 

Real President hlui chuan, "Bale hian a hlawh a tihniam duh lo a ni pawhin ka hrethiam hle. Mahse, kawng dangin a chinfel dan tur pawh an zawng mai tur a ni," a ti a, Bale tan Real-a cham reng chu awm ze nei loah a ngai. 

Welsh forward hian 2019-20 season tluanin match 14-ah chiah inkhel bul a ṭan a, Covid-19 vanga chawlhlawk hman zawh hnu, June-a Spanish football khelh ṭan leh a nih hnuah match hnih chiah a la inlan!

Bale hian season hmasa ṭan dawn khan Chinese Super League club Jiangsu Suning chu kar khata pound maktaduai khat hlawh turin a zawm hman ṭep a, mahse Real-in transfer fee an phut thut avangin Jiangsu hi an inhnukdawk. 

Calderon chuan, "Zidane hi Bernabeu-ah a cham ngei ka ring a, chuti a nih chuan Bale tan chhuah hi a ṭha a ni. Season ṭantir khan Zidane hian La Liga nomawi chu an duh ber a nih thu a sawi a, a hlawhtling. Bale hi a mamawhah a inngai lo ang," a ti!

Real President hlui chuan Bale hi Premier League club zingah pawh duh tu tam tak an awm a ring a, Calderon chuan, "Loan talin chhuahtir se, a hlawh ṭhenkhat tum mai se a dik ang. Tun hma pawhin hetiang hian kan lo ti fo tawh a ni," tiin a sawi.