Zverev chak laiin Tsitsipas chak lo

Halle Grass Court Tournament khelh laiah Alexander Zverev chuan Nilaini zan khan Denis Shapovalov chu 6-2, 6-4 a hnehin quarterfinal a inhlangkai a, season a hman ṭhat a chhawmnung dawn niin a lang.

OWL Arena-a inkhelah Zverev hian hnehna chang turin darkar khat leh minute 15 chauh hun a mamawh, a service a nghet ṭhain tihsual a nei tlem bawk - tualchhung tlangval a nih avangin thlawptu a nei ṭha a, atan inkhelh a nuam zual ngei ang.

Kum 26 mi Zverev chuan, "Shapovalov hi Wimbledon semifinal pawh thleng tawh a ni a, grass court-ah chuan player ṭha bik a ni. Ani lakah ṭha taka ka khel thei hi ka lawm takzet," a ti a, tunlai a khelh danah a lungawi hle tih a sawi bawk.

Inkhel dangah world number 5 Stefanos Tsitsipas erawh a chak lo. Greek tlangval hian Nicolas Jarry chu 7-6(7), 7-5 in a ngam lo. Grass bikah chuan player pahnih hi an intawn ṭum hnihna niin Jarry hi a chak ve ve a ni.

Player langsar dang zingah Danill Medvedev pawhin Serbian player Laslo Djere chu 6-3, 6-7 (5), 6-3 in a hneh. World number 3 Medvedev hi clay leh grass court-a inkhelh harsat tak a ni ṭhin, kumin erawh season dang nena khaikhin chuan result a nei ṭha rih hle.