Kroos tan contract thar

Real Madrid midfielder Toni Kroos chuan kum khat daih contract a ziak thar, tun season tawp ruala a contract zo a pawhsei avang hian kum 2024 June thla tawp thleng Spanish club tan hian a khelh chhunzawm ang.

Germany international hlui hi kum 33 mi chauh a la ni a, player rintlak tak a la ni - player naupang zawkte kaihruaitu ṭha tak a la ni thei ang. Real Madrid tan hian inelna hrang hrangah match 417 a khelhsak tawh.

Season liam ta mai pawh khan rinrawl a la ni a, La Liga match 30 khelin Champions League-ah pawh vawi 12 a la inlan. Bayern Munich aṭanga Real Madrid a zawm hnuah nomawi 20 tehmeuh a chawi tawh a ni.

German midfielder hi season tharah chuan Jude Bellingham nen an khel dun dawn. Bellingham hi kum 19 mi chauh a la ni a, player ṭha leh puitling tak ni tawh mah se tawnhriat ngah Kroos hnen aṭangin thil tam tak zir chhuah tur a la nei ngei ang.