Ronaldo goal hnihin Juve leh Sarri chhan zo lo Maurizio Sarri OUT; Andrea Pirlo IN

Cristiano Ronaldo goal hnih khung chu Juventus him nan a tawk lo. Serie A nomawi pawh Maurizio Sarri dinhmun him nan a tawk zo chuang lo. Old Lady hi Champions League quarterfinal thleng zo loin an tla a, coach Sarri banin Andrea Pirlo-a'n team enkawl hna a thawk dawn.

Zirtawpni zan khan Juventus hian an mikhual Lyon 2-1 in an hneh a, last 16 first leg nena belhkhawmin 2-2 chiah a ni. Khualmuala goal khung zawk French club hi 'away goal rule' hmangin an tlang.

Allianz Stadium-a inkhelah mikhual lamin minute 12-na lekah penalty an hlawh chhuak. Box chhunga ball tlan luhpuitu Lyon midfielder Houssem Aouar a tlu a, ball lo chuhtu Rodrigo Bentancur-a'n mihring ni loin chiang takin ball pet fuh mah se referee Felix Zwayer-a'n penalty a pe.

Manchester United player hlui Depay-a'n inringtawk tak maia 'Panenka chip' a neih lai thlir bak chu Turin club tan tih theih a awm lo. Aouar, Bruno Guimaraes leh Maxence Caqueret te an thawhrim chhunzawm avangin rei tak chu goal an venghim.

Mahse, chawlhlawk hma deuhin Miralem Pjanic-a freekick chu wall a ding Depay-a'n a banin a lo dang; penalty pek niin Ronaldo-a'n a khung zui. Real Madrid forward hian minute 60-naah box pawn 

aṭangin kawh zetin an goal hnihna a khung a, beiseina a chhem nung.

Juve lamin goal an neih belh thei lo, Paris St-Germain nen French League Cup final an khelh ṭuma goal chhuah lo Lyon tlarhnung an ding khawng tlat. Ronaldo-a'n hattrick siamna hun ṭha nei mah se goal zawnah a tauh lo a, striker Gonzalo Higuain-a'n hun ṭha a khawhral bawk.

Ligue 1-ah pasarihna an nih laiin season tihtawp a ni a, coach Rudi Garcia naute hi an dinhmunah an lungawi lo hle. League Cup final-ah chak zo lo mah se team ṭha zawk PSG lakah an tlarhnung a phui, tunah Juve hnehin UCL quarterfinal an lut.

Lyon coach Garcia chuan, "Player ṭha chungchuang, Ballon d'Or vawi nga dawng tawh Ronaldo awmna team kan hmachhawn a ni a, a harsa hle. A bik takin a goal hnihna kha chu mi tlemte chauhin an khung theih ang a ni. Hnehna kan chan chhan chu mimal ni loin kan thawhhona ṭhat vang a ni.

"Tunah chuan Lisbon lam kan hawi thei tawh a, mumang ramah kan cheng mek a, a rei thei ang ber awm chhunzawm kan tum ang. A tira kan tum chu quarterfinal thlen phawt kha a ni, tunah chuan a aia sang kan beisei leh ang," a ti.

Garcia naute hian quarterfinal-ah Pep Guardiola enkawl Manchester City an hmachhawn leh dawn. Coronavirus vangin inkhel kalphung tih danglam a ni a, vawi khat inkhela chak zawk an tlang dawn avangin beisei an la nei thei ang.