Hmana Jeje sulhnu chhuitu Sunil Chhetri

February 2, 2010 khan South Asian Games football inelnaah India-in 5-1 in Pakistan an sawp a, Mizo tlangval Jeje Lalpekhlua'n hattrick a siam - Lalrindika Ralte chuan goal khat a thawh ve bawk.

June 21, 2023 a ni a, Sunil Chhetri chuan Pakistan lakah hattrick a siam - Jeje hnua India tana Pakistan laka hattrick siam leh hmasa ber a ni a, Puran Bahadur Thapa leh IM Vijayan te chu India tana Pakistan laka hattrick lo siam tawh dang an ni.

Thawhlehni zan khan South Asian Football Federation Championship 2023-a an match hmasa berah India hian Pakistan an tawng a, Chhetri-a hattrick hmangin Blue Tigers-in 4-0 in hnehna an chang - Udanta Singh chuan goal khat a thawh ve bawk a, Chhetri-a goal thum zinga goal hnih hi penalty aṭanga a chhuih luh a ni.

Sree Kanteerava Stadium, Bengaluru-a inkhel hi fans 22,860-in a hmunah an en a, boruak a 'hot' hle - India coach Igor Stimac chu Pakistan ball theh tur a lo tibuai a, hei vang hian red card pek a ni. Mizo tlangval Lallianzuala Chhangte pawh India tan a inlan a, a goal khung zan ni lo mah se a khel ṭha hle.

A goal hma

Bengaluru-a inkhelah goal khung turin India-in an nghah rei a ngai lo - inkhel ṭan aṭanga minute 10-na lekah Pakistan goalkeeper Saqib Hanif a chesual a, a ball petchhuah tur a pet ṭhelh chu Sunil Chhetri-a'n a nang ching.

India captain hian harsatna nei loin goal-ah a chantir a, Pakistan an insiamrem hman lo. Goal an chhuah aṭanga minute ruknaah penalty an chawi lehnghal a, Chhetri lo pen chhuakin goal-ah a chantir.

Mikhual Pakistan lamin India an enchhin ve thei meuh lo a, second half-ah pawh thawnthu a danglam lo - minute 73-naah Chhetri chuan penalty a hlawh chhuak leh a, kum 38 mi striker hian hattrick siam nan a hmang.

A la tawk zo lo cheu - Bengaluru chhuahsan a, season thara FC Goa tana khel tur Udanta chuan Bengaluru khelmual Sree Kanteerava Stadium-ah India goal lina a khung a, Blue Tigers-in chiang takin hnehna an chang.

Chhetri a ropui

Kum 38 mi ni tawh mah se Sunil Chhetri-a'n ram tan goal a khung chhunzawm zel a, Blue Tigers tan match 138-ah goal 90 zet a khung ta - heti zat goal khung mai ni lo, ram tana inlan pawh hi thil harsa a tling.

Chhetri hian June 2005 khan India tana a goal hmasa ber chu Pakistan lakah a khung a, ram tana a goal 90-na pawh kum 2023-ah Pakistan lakah a la khung - international football-a goal khung hnem lamah Chhetri hi palina a ni nghal.

India captain hian match 142-a goal 89 khungtu, Malaysian legend Mokhtar Dahari a khum a, a chungah hian Lionel Messi (103), Iran legend Ali Daei (109) leh Cristiano Ronaldo (123) te an awm.

Chhetri hian Daei goal khung zat goal 109 a khung thei ang em, tih chu zawhna langsar a ni mek - India hian kuminah Thailand-a neih tur King's Cup leh Malaysia buatsaih Merdeka Cup te an la khel dawn a, Chhetri tan beiseina neih a thiang.

Lawm a kim lo

India-in hnehna an chang a, mahse, Mizo mit fukna Lianzuala'n goal a khung loh miau avangin Mizo football fan-te chu kan lawm a kim kher lo ang - Mizo forward hian goal a khungah inngai mah se offside vangin pawm a ni lo.

Lianzuala chuan, "Ka khel ṭha thawkhat chuan ka inhria. Mahse, tlarhmaa khelh hi chuan, goal emaw assist emaw kan neih loh hi chuan tlarhmaa inkhel tan chuan khel ṭha tawka inngaih hi a harsa ve ṭhin," tiin Vanglaini a hrilh.

Mumbai City forward hi a tlan tam a, tlarhma lamah a thawhhlawk a ni satliah lo a, a ṭul hunah a tlan let tam tel bawk a, Pathianni zan lawkah khan Intercontinental Cup a khel tih rin pawh a harsa zawk hial.

Mahse, Lianzuala chuan, "Rin aiin khua a lum lo hlauh a, chu chu kan chhawr a ni," a ti a, Bengaluru-ah ruah sur mah se tournament khel zo hlim India tan chuan khawlum ai chuan malsawmna a ni.