India coach Stimac a che 'hot'

Blue Tigers coach Igor Stimac-a'n India leh Pakistan inkhel boruak sanzia a 'show' a, referee thutluknaah lungawi loin Pakistan player Abdullah Iqbal-a 'throw in' tur chu a lo tibuai - team pahnih inkarah buaina a chhuak zui a, Stimac hi hnawhchhuah a ni.

Mahse, Croatian coach hian a chet danah a inchhir loh thu a sawi chhuak. Player a nih laia Croatia tana match 53 khel thei Stimac chuan, "Football hi chuan thinlung a khawih bik ṭhin a, a bik takin ram tan a nih chuan a danglam ṭhin.

"Nizan lama ka chet dan kha a ṭhen chuan inhuain, a ṭhen chuan inlawm mai thei. Mahse, kei chu huaisen taka bei ṭhin mi ka ni a, thutlukna dik lo awmah khatianga ka chet a ṭul chuan ka che leh ang," a ti a, a inchhir lo.

Mizo forward Lallianzuala chuan, "Pakistan leh India a nih avanga a danglamna tak chu keimahah chuan a tam lo. Mahse, ram pahnih inkara thil lo thleng tawh ṭhin ngaihtuah chuan, theihtawp chhuah loh a har a, a bik takin mipui thinlungah chuan a dang khawp ang," a ti.

Team pahnih intawn hma hian Chhetri chuan ram pahnih inkar chungchang a lo sawi tawh bawk. Bengaluru striker chuan, "Pakistan nen kan inkhelh dawn reng rengin, buaina kan nei ngai lo. Ṭha takin kan titi ho a, Punjabi ṭawng hmangin kan inbiain, kan inkawm thei vek.

"Mahse, khelmual kan lut a, hamrik a rik chiah hi chuan a dan a dang vek zel. Ka hrethiam bik lo, Indian kan nihna angin kan rilruah chu boruak chu a awm sa a ni ang - anni pawhin hetiang hian an sawi tho ang. Anni laka tlawm duh lohna hi chu a awm sa a ni," a ti.

A tawpah India an chak a, an hmabakah Nepal leh Kuwait an awm. Inrinni zan dar 7:30-ah India hian Nepal an hmachhawn leh dawn a, Blue Tigers tan hna harsa a awm lo tura ngaih a ni.