Japan kan huphurh bik lo - Sentea
AFC Under-17 Asian Cup khelh mek group stage-a an match hnuhnung berah India chu vawiin tlai dar 5:30 hian an inlan dawn a, Japan an hmachhawn dawn - Blue Tigers hian quarterfinal luh an duh chuan chak ngei ngei an mamawh.
India hian match hmasa berah Vietnam chu 1-1 a inhnehtawkpuiin, match hnihnaah chak mamawh mah se Uzbekistan chu 1-0 in an ngam lo - hei vang hian Japan lakah chak ngei ngai an mamawh a, an tlawm a nih chuan Asian Cup an mangṭha nghal thei ang.
Khawzawl rawlthar Vanlalpeka Guite (Sentea) chuan, "A mimal tak chuan Japan aiin Uzbekistan ka huphurh zawk - Japan hi chu ka ngam ve êm êm ringawt mai a ni. Kan huphurh bik lo," tiin Vanglaini a hrilh a, hnehna chan ngei theih a inbeisei.
India vanneihna chu an kutah engkim a la innghat tiin a sawi theih - Japan hi an hneh chuan an tan tlang chance a sang. Blue Tigers hian Japan hi hneh ta se, point li an nei ang a, Japan nen an point hmuh zat a inang ang.
Mahse, Asian Cup-ah goal difference aiah head-to-head en a ni a, India an tlang thei dawn tihna a ni. Chutihrual chuan inkhel lehlamah thil mak a thleng a, Vietnam-in Uzbekistan an hneh a nih chuan Blue Tigers dinhmun chhut ṭhat a ṭul dawn.
Uzbekistan hian Vietnam hi draw ta se, an tlang ang. Mahse, an tlawm chuan Vietnam pawhin point li an nei ang a, India hi chak ta pawh ni se, team pathumin point li an hmu ang - a pumpui goal difference en zui a ṭul dawn tihna a ni a, hei hian India dinhmun a tiderthawng thei ang.
A tawi zawnga sawi chuan India tan chak phawt a pawimawh hmasa ber a, mahse, an hmachhawn tur hi champion lai Japan an nih miau avangin a awlsam dawn lo tih a chiang.
Blue Tigers squad-ah hian Sentea bakah Bawngkawn winger Lalpekhlua leh striker Thanglalsuon Gangte te an awm a, player pathumin hmun pawimawh an chan ṭhin avangin Japan lakah an khelh ṭhat a ṭul dawn.
Japan coach Yoshiro Moriyama chuan, "India team hi an chak ṭha tih ka hria a, inbuatsaihna kan neih ṭhat a ṭul khawp ang," tiin a lo sawi tawh a, tun tournament-a player hmuhnawm pawl Rento Takaoka leh Yutaka Michiwaki te Indian player-ten dah ṭhat dan an ngaihtuah a ṭul ang.