Mangṭha Maurizio Sarri

Nikum nipui lai khan Juventus hian duh takin Maurizio Sarri an lalut a, season thum daih contract an ziah pui - season khat lek a liam hnuah Italian manager hi an ban leh ta si! Serie A champion ni mah se inelna dangah beisei an phak lo.

Juventus hian a zawna a vawi kua nan league nomawi an chawi a, an ti ṭha thawkhat. Mahse heng an champion season kua kan thlir chuan kumin hi point an hmuh tlem ber leh goal an chhuah hnem ber ṭum a ni. Coppa Italia final-ah Napoli an ngam lo; Champions League-ah pawh hian an player neih dan chhut chuan Lyon hi harsa lutuk loa paltlang thei tura ngaih an ni - mahse an ngam lo. League nomawi chawi chiang viau mah se a tawp lamah an zuih viau bawk.

Old Lady chuan thuchhuah siamin, "Juventus Football Club chuan Maurizio Sarri-a'n hna a chawlhsan tih kan puang, season kua a zawna kan champion theih nana a hna tawh avangin a chungah lawmthu kan sawi. Italian football chawi nung tura a hna thawh pawh kan fak hle," an ti.