Hello Andrea Pirlo

Juventus chuan Sarri an ban hnu lawkah Andrea Pirlo chu an coach thar a nih thu an puang. Under 23 manager atana an ruat aṭanga ni kua chauh a liam hnuah first team enkawl turin an ruat zui nghal - team enkawl lamah tawnhriat a nei mumal hman lo.

Kum 41 mi Pirlo hian season hnih daih contract a ziak, an inrem dan chuan June, 2022 thleng a enkawl ang - player a nih laia a khelhpui, amah aia kum khata upa zawk goalkeeper Gianluigi Buffon a enkawl dawn tihna a ni.

Italy international hlui Pirlo hian Juve tan 2011-2015 chhung khan a khel a, Serie A nomawi pali, Coppa Italia pakhat leh Italian Super Cup pahnih a chawi pui hman. Player a nih laia a hlawhtlinna ang hi chanpui leh a tum dawn, a hmabak erawh a hautak ang; league nomawi chawi ringawt a tawk dawn lo.

Juventus chief football officer Fabio Paratici chuan, "Pirlo hi kan tana hlawhtling taka lo khel tawh a ni, tun thlengin he club tana awmte nen kan la inzawm ṭhat em avangin a rawn lut hi a mak lo. Player a nih laia a ropuina ang kha a rawn chhawm leh ngei pawh kan beisei," a ti.