Kan fimkhur a ngai dawn - Lianzuala

South Asian Football Federation (SAFF) Championship 2023-a an match hnihna chu zanin dar 7:30 hian India-in an khel dawn a, Nepal an hmachhawn dawn avangin awlsam deuh tura ngaih a ni.

Hetihlai hian India forward Lallianzuala Chhangte erawhin an tan fimkhur a ṭul thu Vanglaini a hrilh a, Lunglei tlangval chuan, "Hneh chiang saah chuan kan dah thei bik lo ang," tiin football-ah eng pawh a thlen theih thu a sawi.

Blue Tigers leh Nepal hi ram inṭhenawm lawk an ni bawk a, vawi 23 zet an intawng tawh - India hian vawi 16 hnehna changin, vawi nga an in draw a, Nepal hi vawi hnih an chak ve tawh thung.

Stimac tel lohna

India coach Igor Stimac-a'n Pakistan nen an inkhelh ṭumin buaina a chawk chhuak a, Croatian coach hi red card pek a ni - hemi a nih avang hian Stimac-a'n zaninah a naute a ho thei dawn lo a, assistant coach Mahesh Gawli chuan Blue Tigers hi a ho ang.

Player lamah pawh India hi an inkhek deuh tura ngaih a ni a, Mizo forward Lallianzuala pawh hahdamna hun pek a ni mai thei - kum 38 mi Sunil Chhetri pawhin hahdam a mamawh viau tura ngaih a ni a, Sandesh Jhingan leh Anirudh Thapa te pawh kan hmu lo a nih pawhin a mak lo ang.

India hian June 27 zanah Kuwait an hmachhawn dawn a, tun SAFF inelnaa team hmachhawn hautak ber tura ngaih an nih avangin India tan Nepal laka chawlh hahdam hi tihâwm tak a ni.

Nepal dinhmun

Nepal hi season hmasa lawka ISL club NorthEast United enkawltu Vincenzo Alberto Annese enkawl an ni a, Italian coach hian March 2023 aṭang khan Nepal hi enkawl ṭanin, Indian football hrechiangtu a ni.

Alberto hian Gokulam Kerala pawh lo enkawl tawhin, season hnih chu a zawnin I League champion a nihpui thei - player zingah pawh goalkeeper Kiran Chemjong hi RoundGlass Punjab keeper a ni a, striker chhuanvawr Anjan Bista hi I League club Mumbai Kenkre tana khel a ni bawk.

Midfielder Rohit Chand hi Nepal innghahna a ni a, kum 2018 khan Indonesian top flight league Liga 1-ah Best Player a ni thei - Indonesian club Persik Kediri tan a khel mek a, tlarhnungah pawh a chhawr theih.

Fimkhur a ngai

Nepal hi Kathmandu-a khelh zawh hlim Prime Minister's Three Nations Cup-ah an champion a, mahse, hemi hnu hian friendly match-ah Philippines chu 1-0 in an ngam lo a, SAFF-a an match hmasa berah Kuwait chu 3-1 in an ngam lo bawk - zanin an chak loh chuan tlakna chance a sang sawt dawn a, thih tha nen an bei ang.

Lianzuala chuan, "Tun hnaia kan result leh dinhmun ngaihtuah chuan chak ngei tur chu kan ni a, hneh pawh kan tum ang. Mahse, kan inthlahdah lutuk chuan kan tisual thei a ni," a ti a, zaninah hnehna chan ngei a tum.

India hi Hero Intercontinental Cup-a tlawm nei loa champion hlim an ni a, SAFF match hmasa berah Pakistan chu 4-0 in an sawp bawk - boruak ṭhat vanglai tak a ni.