Inter chakna Romelu Lukaku

Romelu Lukaku goal hnih khung hmangin Inter Milan chuan Cagliari 4-1 in an sawp a, manager Antonio Conte kaihhruai team hian Coppa Italia quarterfinal an thleng. Team ṭha dang Napoli leh Lazio te pawhin goal chhuah loa an khingpui ve ve hnehin a thiam pariat zingah an inhlangkai ve bawk. Nizan khan Juventus, AC Milan, Fiorentina leh Atalanta te an inlan zui - result erawh kan hre hman lo

.

San Siro-a inkhelah goal kan hmu hma hle, hamrik hmasa ber a rik aṭanga second 21 hnu lekah Christian Oliva ball pek sual vangin Lukaku chuan goal hmahruai a khung, chawlhlawk hmain Borja Valero-a'n Inter goal hnihna a khung bawk.

Second half-ah Lukaku bawkin an goal thumna a khung a, mikhual team lamin Olivia hmangin si khat sut ṭhen ve bawk mah se Andrea Ranocchia chuan an goal hnuhnung leh chak nemnghehna a khung. Cagliari tan hian Inter Milan aṭanga loan hmanga an hawh midfielder Radja Nainggolan chuan goal khung theihna hun ṭha nei mah se a ban a tihper hlauh a, a vannei tawk lo - a hun ṭha neih hi goal thum an chhuah hnu a nih vangin lut pawh ni se kawngro a su tam lo ang.

Belgium international striker Lukaku hian Manchester United chhuahsana Inter a pan hnuah a khel ṭha tluang hle, season kal laia match 25 a khelh aṭangin goal 18 a khung tawh. Argentine striker Lautaro Martinez nen tlarhma lamah an inkawp fuh hle a ni. Thla thum hnua a vawi khat nan Alexis Sanchez pawh inkhel bul ṭantu zingah a tel leh thei tawh, coach Conte tan tlarhma lamah duhthlan tur ti tamtu a ni. Inter hian kum 2011 hnua a vawi khat nan Coppa Italia nomawi chawi leh theih an beisei mek.

Inter Milan manager Antonio Conte chuan, "Player rilru put hmang a dik em em a, nitin mai hian hma lam kan pan zel niin ka hria. Ka naute hian 100% rilru an pek miau avangin team dang tan hmachhawn kan harsat phah ngei ka ring ṭhin. "Training-na hmunah kan thawkrim a, kan zir leh tum anga kan khel chhuak thei hian min ti lawm," a ti. Inter hneh tak Cagliari hi Serie A lama parukna ni lai an ni a, season thara Champions League khelh tum ngam an nih avangin team ṭha an ni.

Serie A pahnihna nilai Inter hian quarterfinal-ah chuan Fiorentina leh Atalanta te inkhel a chak zawk an hmachhawn leh ang. Pathianni zan hian league match khel turin Lecce khelmual an tlawh dawn a, January 26-ah Cagliari nen bawk Serie A match an khel leh ang.

Champion lai Lazio tan Serie B lama talbuai mek Cremonese hneh turin harsatna a awm lo. Tun hnaia khel ṭha tluang tak Lazio hian Patric, Marco Parolo, Ciro Immobile leh Bastos te goal khat ṭheuh hmangin 4-0 in hnehna 

an chang.

Inkhel dangah Napoli an vannei, forward Lorenzo Insigne-a penalty vawi hnih chhuih luh hmangin Perugia 2-0 in an hneh. Arsenal goalkeeper hlui, Napoli tana khel ta David Ospina chuan Pietro Iemmello-a penalty chhuih a dansak thung a ni.

Gennaro Gattuso enkawl Napoli hian kartawpah fiahna hautak an hmachhawn zui leh dawn, league lama an elpui Fiorentina nen Inrinni zan dar 1:15-ah an intawng ang. Serie A lama pathumna ni lai Lazio chuan Inrinni zan dar 7:30-ah Sampdoria an mikhual thung ang.