Tuipuiral hnehin Tuichangralin semifinal an lut

Tata SK 712 Pro Volleyball League semifinal hmun ruak pakhat la awm chu Tuichangralin an hnawhkhat. Ningani zan inkhel hmuhnawm takah Tuichangral hian Tuipuiral chu 3-2 (23-25, 25-23, 18-25, 25-20, 15-5) a hnehin a thiam zual pali zingah an tel.

Tuichangral hian semifinal-ah Thutak Nunpuitu Team (TNT) an hmachhawn dawn a, nizan khan Chhinga Veng Spikers leh Hunthar ten league round hnuhnung ber an khel a, anni pahnih hi final luh inchuha inkhel zui ve leh tur an ni.

A hmuhnawm

Tuichangral leh Tuipuiral an inkhelh hma hian semifinal lut pathum a chiang tawh a, anni pahnih inkhela chak zawk hi tlang tur an ni tih pawh hriatsa a ni. R. Dengṭhuama Indoor Stadium, Mualpuiah inkhel hmuhnawm en châk mipui an pungkhawm.

Champion lai Durtlang North hneh hlim Tuipuiral an phur a, an khingpui Tuichangral aia point khata sang zawk chungin league match hnuhnung ber hi an khel - player ṭha bik Anurag Rawat an neih bawk avangin inrintawkna pawh an nei sang hle.

A tir lamah khel ṭhain an dinhmun pawh a ṭha hman. Mahse, player mala an innghat lutuk an tuar, inkhel tawp lamah Anurag a chau. Delhi tlangval hian point 59 tehmeuh vaw chhuak leh mah se a tawp lamah a team a khai chhuak zo ta ngang lo.

PVL match khata point hmu hnem record siam thei Anurag hian a match hnuhnung pathumah point 174 tehmeuh a hlawh chhuak, mahse tualchhung player zingah amah thlawp ṭhatu an awm hleithei lo chu an tuar, a vawi li nan D3 Business Player of the Match atan thlan a ni ta tho.

Tuipui aiah Tuichang

Aizawl khawpui pawn aṭanga PVL khel hmasa ber Tuichangral hian 2018 khan final an khel tawh a, a dawt season-ah semifinal thleng zo lo mah se nikum khan league round-a pahnihna ni chungin knockout round an lut.

Kuminah an tawnhriat neih an chhawr ṭangkai. Inkhel boruak sangah set hnih an hloh hnuin an tho chhuak leh thei a ni a, a vawi khat nana PVL kheltu Tuipuiral aiin an puitlin bakah team an ṭangrual ṭha zawk.

PVL-ah hian a chak zawkin point thum an hmu ṭhin a, a chak lo zawk tan point a awm lo. Mahse, set ngana (deciding) an khelh chuan, a chakin point hnih hmuin a chak lo lamin point khat an hmu ve thung ṭhin.

Tuipuiral leh Tuichangral te hian league match vawi nga an khelh aṭangin point li ve ve an hmu, point hmuh zat inangah Tuichangral hian vawi hnih hnehna an chang a, chak tam zawk an nih avangin table-ah a chung zawkah awmin an tlang.

Luangmual hmaah Bungkawn

Tata SK 712 Pro Volleyball League hmeichhe semifinal chu zanin dar 8:00 hian khelh a ni dawn. R. Dengṭhuama Indoor Stadium, Mualpuiah volleyball ngainatute an kalkhawm dawn a, in lam aṭanga en duh tan LPS-ah en theih a ni bawk.

Luangmual hian a vawi khat nan PVL an khel a, tun season atan chuan state pawn aṭanga player lalut awmchhum an ni. State pawn aṭanga chah luh Nipa Barad-i a khel ṭha ṭhin a, league round-a an chak kim theih chhan pawh a ni.

Semifinal-a an khingpui tur Bungkawn pawh hi 3-0 a an hneh tawh an ni, an intawn hmasakah hian Nipa Barad-i'n point 22 a nei a, ṭum 11 a tisual thung. Set la loin Bungkawn hi an chak lo, mahse set an lak lohna hi point tlemtê chauh zel a nih avangin an chhe zawk viau tihna erawh a ni bik lo.

Luangmual laka point 18 vaw chhuaktu F. Lalparmawii a khelh fuh ṭum a nih phawt chuan Bungkawn lamin chak an tum ngam ang. F-i hi RK Lalfakmawii nen an hmuhnawm ṭhin, anni pahnih hi zanina an innghahna tur an ni ang.