Khelmual mawitu, pawn lama sumdawng thiam Michael Jordan

Michael Jordan tih hming hre tur hian basketball tui viau kher a ngai lo - khawvelin Lionel Messi leh Cristiano Ronaldo a hria a, golf en ngai hauh lo pawhin Tiger Woods hming inhria a ni lawm ni?

Chutiang chu a ni - he Michael Jordan hi. Chicago Bulls jersey ha chunga NBA mawi ṭhintu, India hmarchhak aṭang pawha zing tho hma chunga a inkhel lai kan en ṭhin hian basketball a chawlhsan hnuah pawh, a infiamna ngainat tak hmang hian sum a la lalut reng.

Khelmual chhunga a ropuizia te, khawvelin a ngaihsanzia te hi a thunawn ang maiin kan sa ngun a, kan ngaithla hnem a, kan hre hnem tawk tawh - sumdawnna khawvela a hlawhtlin zui dan erawh sawi a tam tawk lo a, entawn leh ngaihsan atan a ṭha viau lawi si.

Kum 60 mi ni ve tawh Michael Jordan hian tun hnai khan NBA-a a club Charlotte Hornets chu dollar tluklehdingawn thumin a hralh a, Hornets a hralhna aṭanga a sum hlep zat leh a sumdawnna tihfuh dan hi ngaihnawm a tling.

Sumdawnna chu

Michael Jordan hian NBA club Charlotte Hornets-a a share tam zawk chu a hralh a, a hralhna zat hi tarlan ni chiah lo mah se khawthlang media-te chuan dollar tluklehdingawn thumin a hralh niin an sawi.

Hornets leitu sumdawng intelkhawm hi tuna share nei sa Gabe Plotkin-a ho an ni a, American sumdawng hausa Rick Schnall, North Carolina rapper Jermaine Cole leh country music singer Eric Church te nen ṭang rualin Hornets-a share tam zawk hi an lei.

Kum 13 zet Hornets neitu lo ni tawh Jordan chuan a siam len club a mangṭha a, lungchhe taka inthlah erawh an ni lo - Jordan hian a club a hralh aṭang hian dollar tluklehdingawn hnih hlawkna a tel nia sawi a ni a, kum 13 chhunga club hlutna a vawrh san dan hi a ropui lai chu a ni.

Michael Jordan hian basketball a khelh chhung zawng khan a inkhelh hlawh aṭangin dollar maktaduai 93 chuang a hlawh a, Nike nena sumdawnnaa an thawhhona aṭangin $1.8tld a hlawh bawk - mahse, tuna a hlep hian heng zawng zawng hi a khum! A nep mawlh lo.

Engtin nge?

Kum 13 chhung leka Jordan-a hlawkna tel dan hi a tam tham takzet a, mi tam takin eng tin nge a tih theih zawk, tiin an inzawt hial - a awm lo hran lo. Kum 13 chhunga $2tld-a hlawk chu a tam tham lutuk tlat!

Mahse, kum 60 mi sumdawng hausa ni ta hian hmanah khan hmathlir thui tak a lo nei daih tawh. Kum 2002 khan Robert L. Johnson chuan sumdawnna hlawk tak a nih beiseiin NBA team belhna Charlotte Bobcats, 2014-15 season aṭanga Charlotte Hornets ni ta hi $300mtd-in a lei.

Johnson hian club inrelbawl nan $30mtd a sen zui tur thu a sawi tel a, regional sports network thlenga a din tur thu a sawi - a hunlaia sum hlutna chhutin a leina man zat a tam a, insenso a tum dan pawh a hraw takzet.

Mahse, Black Entertainment Television (BET) dintu zinga mi Johnson hian a beisei angin a tifuh lo - regional sports network a hlawhtlin loh avangin Time Warner Cable nen broadcasting chungchangah mi aia tlawma an inrem a ṭul a, Charlotte a enkawl tirh kum li chhung chu kum tin $25mtd chân ziah ang a ni!

Jordan lam a hawi

Johnson a che fuh hleithei lo - kum 2006 khan a hnathawk 40 ngawt chu thla khat chhungin a bân hman a, heti chung hian an club chu an tlakchhiat loh tur thu fans hnenah a sawi reng a, a thusawi 'thlawpna' erawh hmuh tur a awm lo.

A tawpah Michael Jordan a lo lang - Johnson-a'n a sawm angin Jordan hian minority stake nei turin Charlotte-ah a sum neih dollar maktaduai engemawzat a seng a, club chhunga basketball chungchangah bik thutawp siam theihna a nei tel bawk.

Mi tam takin Charlotte hi a ding chhuak mai turah an ngai. Mahse, Jordan-a puihna nen meuh pawh eng ruai an ang lo a, player, coach leh agent hlawh leh man atana dollar maktaduai 100 chuang an seng chungin an beisei an hmu thei lo.

A tawpah chuan Johnson hian buaina aṭanga talchhuahna ṭha ber chu Charlotte Bobcats hralh a ni, tih a hria a, club-a a thawhpui sa Jordan lam bawk a hawi.

Thutlukna dik

Michael Jordan-a'n âtthlak taka NBA team talbuai mek tana sum sen a tum lo - amah aia sumdawnna khawvela tawnhriat ngah leh ropui zawk Johnson hi thiam takin indawrna a neihpui a, a sum ang zawng chuan $25mtd 'lek' seng chungin Charlotte hi a lei!

A nihna takah chuan Johnson hian $325mtd emaw $350mtd tala a team hi hralh a tum ve tho - mahse, leiba tam tak la rulh loh a awm a, sumdawnna fuh lo tam tak a awm bawk. Hei hi Jordan chuan thiam takin a chhawr ṭangkai a, sum fai taka a pekchhuah zat hi $25mtd-ah a tla thei.

Michael Jordan hian Hornets a neih hnuah hian khelmual chhunga fan-te beisei ang erawh a pe bik lo - kum 13 he team neitu a nih chhungin Eastern Conference standing-ah parukna aia sang an ni ngai lo a, vawi thum bak playoff an khel phak lo.

Mahse, a tawpah chuan Jordan tan chuan sumdawnna hlawhtling a ni a, $25mtd a senna club kha $3tld-in a hralh a, nikum lawka Forbes-in $1.5tld hlutna nei anga a chhut club tan chuan tam tak a ni - $2tld-in a hlawk tlat!

MJ & Nike

Mi hlawhtling tam tak chanchin kan chhiar a, kan sawi a, a phena an huaisenna hi tam takin kan hmuh hmaih fo - Jordan hi sumdawnnaah hian a vannei bik hrim hrim a ni hran lo a, player a nih lai aṭanga tawhin 'risk' a lak ngamna hi a hlawhtlinna a ni ṭhin.

MJ hian a tirah Converse thawhpui duh mah se 'special' taka an buaipui theih loh tur thu hrilhin, hetihlaia an thawhpui dang Magic Johnson leh Larry Bird te ang thoa an en tur thu an hrilh a, Jordan hian hetihlaia company naupang tak Nike a thawhpui zui.

Hetihlai hian Nike hian basketball khawvel an la luhchilh lo a, NBA-a la inlan lo MJ hmangin 'risk' an la a, Jordan pawhin 'risk' a la ve tho - Nike nen hian kum nga chhung atan contract an ziak a, a sum faia a hlawh tur chu $500,000 'chauh' a ni.

Mahse, MJ hian pheikhawk leh thawmhnaw hralhna aṭangin zângnadawmna dawn theih dan a nei a, he inremna ang hian kaltluang se chuan a hlawh tur chu $2.5mtd a ni - mahse, a hlawhtlin dawn leh dawn loh a chiang lo a, a 'risk' a sang hle.

A fuh tlat

MJ tan risk a sang kan tihrual hian Nike-in inremna an neihpuina ang zat hi, a hunlaia NBA player zingah heti zat contract nei thei an la awm ngai lo - a tawi zawnga sawi chuan Jordan leh Nike ten risk an la ve ve.

Jordan tana risk sang tak erawh Nike hian beiseina sang tak an neih let chu a ni. Kum nga chhung atan contract ziak mah se MJ hi kum thum chhungin NBA All-Star-ah a tel a ngai a, Rookie of the Year a dawn hman a ṭul a, season tin chawhrualin match tinah 29 point a neih a ṭul bawk.

Nike-in heng an bituk zawng zawng hi MJ hian a tlin thei lo a nih chuan Nike hian a kum thumnaah an inremna contract titawp turin zalenna an nei - hlauhthawnawm tak a ni. Mahse, MJ hian kum thum chhungin an beisei ang hi a tihlawhtling vek a, kum khat chhunga a sneaker an hralhna aṭangin Nike hian $125mtd an lalut nghal a, $4mtd an tum chu an khum chiang hle.

MJ hi Nike nen an thawk dun zel a, tunah phei chuan Jordan brand bik an hralhna aṭangin 5% share a nei a, kum 40 chhungin $1.8tld zet Nike aṭangin a hlawh ta - kum 13 chhunga Charlotte aṭanga $2tld a hlawh erawh khum a harsa tawh ang.