Honda lakah beisei ka la nei - Marquez

Honda rider Marc Marquez chuan chhuah a tum rih lo tih a sawi nawn, a awm mekna Japanese team lakah rinna a nghat pumhlum - season tharah pawh an thawkdun chhunzawm ngei dawn niin a lang.

MotoGP vawi ruk champion tawh Marquez hian 2020 khan Honda tan season li daih contract a ziak, an inremna ang chuan kum 2024 thleng daih a ni a, tun hnaiah hliam leh khawl lam ṭha tawk lo vangin harsatna sawi tur an ngah.

An beisei ang result an nei hleithei lo a, an chet fuh theih loh avangin Marquez hi tun season tawp ruala chhuak mai tur anga sawi thawm a awm, mahse Spanish rider hian chhuah mai erawh a la tum lo.

Kum 30 mi Marquez chuan, "He hmuna ka awm chhan chu Honda ka rintawk vang a ni, kan team hian nasa taka hmasawnin midang chungah kan awm leh ngei thei tih hi a takin ka ring.

"Kei chuan ka awmna hmun bak thil dang ka ngaihtuah ngai lo, chuvangin team dang nena ka chungchang thu an lo sawi zawm a nih chuan thu dik lo an sawi tihna a ni," a ti.

Intlansiak hnuhnung ber German Grand Pirx-ah khan Marquez hi qualifier lamah a chesual a, inelna tak pawh hmachhawn thei loin a inhnukdawk - atan tun season chu champion beiseina a bo tawh.

Marquez chuan, "Tlan chinnaah ka chesual a, ka chetsual tirh kha chuan ka tlan chhunzawm theih mai kha ka ring, mahse a hnuah ngun takin ka ngaihtuah a, ka taksa dinhmun endik bawk niin ka tan tlan zui loh kha a ṭha zawk," a ti.

Bike intlansiakna sang ber hi tun season chhungin vawi 13 an tlan tawh, a vawi 14-na turin Pathianni tlai dar 5:30 hian TT Circuit Assen-ah Dutch Grand Prix an tlan leh ang.