IOC-in boxing-a thuneitu sang ber IBA dinhmun a hlihsak

International Olympic Committee chuan International Boxing Association chu boxing enkawlnaa thu ber a nihna hlihsak turin vote an thlak. Ningania vote thlakah hian vote dik 70 aṭanga vote 69-in rawtna hi an thlawp.

IOC executive board chuan June thla tir lam khan IBA dinhmun hlihsak hi an rawt a, hei hi IBA-in kum 2019-a rorelna chungchangah leh eirukna a neih nia sawi avanga suspend a nih hnua siamṭhatna tur ruahmante a tihhlawhtlin loh vang a ni.

April thla khan IBA aṭanga chhuak hrang World Boxing chu din a ni. Tokyo 2020 Olympic-a boxing kha IOC buaipui a ni a, hei hi a chhan chu IBA sum leh pai, rorelna, ethics, referee leh judging an rin zawh loh vang a ni ber.

Olympic thuneitu sang IOC hian Paris 2024-ah pawh boxing inelna hi an buaipui leh ang. Los Angeles 2028-ah boxing hi dah bo zet a ni a, mahse IOC session vawi 140-naaah IOC director general Christophe de Kepper chuan boxing hi a awm ngei tur thu a sawi.

IOC chuan October thla hian Olympic-a boxing kalpui dan tur chu a tichiang ang. Vote thlak hma hian IOC president Thomas Bach chuan, "Boxing nen intihthiam lohna kan nei lo. Boxer nen harsatna kan nei lo. Boxer-te hian khawvel pum huapa anmahni hruaitu tur ṭha leh lang tlang an mamawh a, hruaitu ṭha neih hi an phu bawk," tiin a sawi a ni.