Queen's Club C'ship quarterfinal-ah Alcaraz

Wimbledon inbuatsaihna tournament zinga mi Queen's Club Championship khelh laiah, world number 2 Carlos Alcaraz chuan Jiri Lehecka chu 6-2, 6-3 a hnehin quarterfinal a in vaw kai.

Spanish tlangval Alcaraz hian season hmasa khan Wimbledon fourth round a lut a, a hnu lamah chuan tun ṭum hi grass court inelna a hmachhawn leh hmasak ber a ni hial, a inkhelh thiamna tak hmun a ni hran lo.

Mahse, beisei phak bakin Alcaraz a inkhel ṭha rih, a hlim thu sawi zuiin, "Ka khelh danah ka lawm hle, grass court-a tawnhriat ka neih belhna zel a ni nghal bawk. Grass court tournament bika quarterfinal ka luh vawi khatna a nih avangin ka ngaihlu hle," a ti.

Inkhel dangah Alex de Minaur chuan Diego Schwartzman chu darkar khat leh minute hnih chhung lekin 6-2, 6-2 in a hneh, a match hmasa lamah tun hnaia insiamṭha tak Andy Murray a hneh theih bawk avangin Australian tlangval a kaltluang hle.

World number 46 Adrian Mannarino pawhin American tlangval seeded pathumna Taylor Fritz chu 6-4, 7-6 (9-7) in a hneh. Player langsar leh ṭha tel an tam avangin champion nih a awlsam dawn lo.

Grass court inelna lian ber Wimbledon hi July 3 aṭangin All England Club, London-ah khelh a ni dawn.