Aston Villa-ah McGinn a nghet

Aston Villa captain John McGinn chuan contract thar a ziak - Premier League club nen hian kum 2027 thleng atan inremna an siam a, coach Unai Emery kaihhruaina hnuaiah mawhphurhna pawimawh a chelh zui dawn.

Scotland midfielder McGinn hian 2018 khan Scottish Premiership club Hibernian aṭangin Villa hi a zawm. Kum 2019 Championship playoff final-ah khan Villa tan goal pawimawh a khung, a goal vang hian English football inelna sangah an kir leh theih phah.

Nikum nipui lai khan McGinn hi Villa captain atan ruat a ni a, season hmasa khan inelna hrang hrangah match 36 a khel, coach inthlak boruakah pawh hmun pawimawh a chang chhunzawm zel tihna a ni.

Aston Villa chuan thuchhuah siamin, "Kan team a rawn zawm aṭangin ṭhahnem a ngaiin theihtawp a chhuah reng a, khelmual chhungah a ṭangkaiin midang tana entawn tlak a ni a, khelmual pawn lamah pawh hruaitu ṭha a ni bawk," an ti.

McGinn hoin Villa hian season hmasa an hmang ṭha a, kum 2010-11 season hnua a vawi khat nan European football an khel dawn, inelna sang pathumna Europa Conference League-ah an inlan dawn a ni.