Dzeko-a'n Fenerbahce a pan

Edin Dzeko chuan Inter Milan tan a contract a hmang zo a, Italian club hi chhuahsanin Fenerbahce chu man nei loin a zawm - Turkish club tan hian season hnih daih contract a ziak.

Kum 37 mi ni tawh mah se Dzeko hi a la ṭha pangngai viau - Champions League final khelh zawh takah pawh khan Inter tan a inlan a, a club hlui Manchester City lakah 1-0 in a vanduai zawkah an ṭang.

Serbian star Dzeko chuan, "Inter tan season hnih chhung hun nuam leh duhawm tak ka hmang a, tunah chuan mangṭha tih a lo hun ta. Ka chunga in ṭhatna zawng zawng avangin lawmthu ka sawi," a ti.

Dzeko hian 2021 khan AS Roma aṭangin Inter Milan hi a zawm - Inter tan hian inelna hrang hrangah match 101 a khelh aṭangin goal 31 a khung, season hmasa bikah khan goal 14 a khungsak.

A club thar tur Fenerbahce hian season hmasa khan Super Lig-ah Galatasaray an tluk lo, an ram league sang berah hian kum 2014 hnu lamah a la champion leh lo a, season tharah nomawi an beisei ang.