Lianzuala'n India a làmpui - semifinal an lut
SAFF Championships khelh meka an match hnihnaah India chuan 2-0 in Nepal an hneh a, match hmasa zawkah Pakistan an hneh tawh bawk avangin semifinal an lut chiang - Blue Tigers-in kawng dik an zawh zel.
India tan bench aṭanga luhtir Lallianzuala Chhangte-in goal khung lo mah se, Mizo forward a luh hnuah India inkhel a danglam a, ISL hero of the league hian national team-ah pawh hmun laili a chang chhunzawm zel.
Blue Tigers tan Sunil Chhetri leh Naorem Mahesh Singh ten goal khat ve ve an khung a, mikhual Nepal-in a chhanletna tur an neih loh avangin India-in semifinal an lut - group A inkhel dangah Kuwait chuan 4-0 in Pakistan an sawp ve bawk.
India hi Thawhlehni zan dar 7:30-ah an inlan leh dawn a, inelnaa tel ve tura sawm Kuwait nen hmahruaitu ni chunga semifinal luh an inchuh ang - a hmuhnawm dawn.
Lianzuala a tel lo
Sree Kanteerava Stadium, Bangalore-a inkhelah India coach Igor Stimac chu hrem vangin a inlan thei lo a, a aiawhin assistant coach Mahesh Gawli a din a ṭul - India tan Nepal mah ni se, chak loh theih a ni.
Heti chung hian India-in thutlukna huaisen takin an siam a, Hero Intercontinental Cup khel zo hlim an nih bawk avangin Lallianzuala Chhangte, Anwar Ali, Sandesh Jhingan leh Jeakson Singh te ho chu bench-ah dah an ni a, Kuwait la hmachhawn tur India an inkhek khal.
Hetih rual hian Pakistan laka hattrick siamtu Sunil Chhetri erawh ama duhthlannain bul ṭantir a ni a, Manipur tlangval pahnih Udanta Singh leh Naorem Singh ten an thlawp - Pakistan laka inlan aṭangin Chhetri bakah Anirudh Thapa leh Sahal Abdul Samad te chu bul ṭan nawn awmchhun an ni.
Mahse, inkhel hmasa zawka chak lo tawh Nepal an fimkhur a, tlarhnung an inremphui ṭhat avangin India-in an nawr hleithei meuh lo - goal lut loin chawlhlawk hman a ni a, Indian football fan-ten an duh an hmu lo.
Lianzuala a tel ta!
Nepal tan Arik Bista chuan chance duhawm nei mah se Gurpreet Singh Sandhu chuan ṭha zetin a dansak a, mual ding lamah Manish Dangi a hnawksak viau bawk - chawlhlawkah India an infuih ṭha tih a lang a, minute 61-naah goal an khung ta nge nge.
Sahal leh Mahesh ten ṭha zeta ball an inpek kual hnuah Mahesh hian Chhetri tan ṭha zetin a siamsak a, India captain hian ram tana a goal 91-na khung turin harsatna a tawk lo - international football-ah goal a khung chhunzawm zel.
Minute 63-naah India-in substituion an siam a, Udanta la chhuakin Lallianzuala luhtir a ni a, Rohit Kumar aiah Jeakson Singh a lut bawk - India game a nung sawt a, an goal nawr a nat sawt avangin Nepal an talbuai.
Minute 70-naah Chhetri-a shot chu Nepal goalkeeper Kiran Kumar Limbu chuan lo khawih perin, bar a per a, a per lehlam hi Nepal tlarhnungten an petchhuah hmain Mahesh Singh chuan goal-ah a chantir - Manipur tlangval tan ram tana a goal hmasa ber a ni.
A pawimawh ber 3
Minute 60 hnuah Lianzuala a lut a, Lunglei forward chuan, "Inkhelh hmain coach khan a ṭul viau loh chuan ka luh loh tur thu a sawi a, mahse, ka lut ta a ni. Kan luh hnuah game a nung ve deuhin ka hria a, goal ka khung ta lo erawh ka ui.
"Mahse, a pawimawh ber chu point thum kan hmuh kha a ni a, kan tihlawhtling thei a, ka lawm hle," tiin Vanglaini a hrilh - Lianzuala hian Nepal keeper Kiran chu a enchhin hman a, mahse, RoundGlass Punjab keeper hian a dansak.
Lianzuala pet a dan per avangin Kiran hian corner a chawi a, heta ṭanga ball kal hi Rahul Bheke chuan tauh luhna remchang nei mah se Nepal keeper hian a dang nawn - an mualpho lutuk tur chu a team a chhanhim.
Nepal hian June 27, tlai dar 3:30-ah Pakistan an hmachhawn ve leh dawn a, team pahnih hi an match hmasa pahnihah an tlawm ve ve avangin beisei tur an nei tawh lo.
India hmasawnna
Blue Tigers hian September 5, 2019 khan Oman an ngam lo a, hemi hnuah mahni mualah India hi an tlawm leh tawh lo - India-ah match 12 chhung chu tlawm nei loin Blue Tigers hi an kaltluang tawh tihna a ni.
Lianzuala chuan, "Tun hnaiah India game hian hma a sawn nasa. Tlarhnung aṭangin game pawh kan sawi ve ngam tawh a, inringtawk takin ball pawh kan keng ngam ve tawh - hei hi a chhan lian takah chuan ISL-a khelhna kan chan tam vang a ni," tiin Vanglaini a hrilh.
Mumbai forward chuan sawi zawmin, "Thil pakhatah chuan ISL club-ten tactic kan ngai pawimawh ta hi a ni bawk - game zirchianna leh thlithlaina te uluk zawkin kan kalpui tawh a, hei hian nasa takin min pui a ni," a ti.
India hian match riat zet chu a zawnin tlawm an nei ta lo a, Intercontinental Cup leh SAFF lama an khelh dan thlirtute chuan hmasawnna hmuh tur a awm, tih an hria ang - India-in hma lam panin ke a pen zel e.