Bungkawn hnehin Luangmualin final an lut
Inrinni zan Tata SK 712 Pro Volleyball League semifinal-ah Luangmual chuan Bungkawn chu 3-0 (25-22, 25-16, 25-20) a hnehin, hmeichhe inelna huangah final an inhlangkai.
Zanin dar dar 8:00 hian R. Dengṭhuama Indoor Stadium, Mualpuiah semifinal pahnihna khelh chhunzawm a ni dawn - Kanan leh Bethlehem Vengthlang te an intawng dawn, team ṭha pahnih inkhel hi a hmuhnawm ang.
Kanan leh BVT te hi June 8, Ningani khan an lo intawng tawh - inkhel inhnehtawk takah Kanan hi 3-1 in an chak. Team pahnih player neih an inkhairual viau a, langsar fal nalh awm hran lo mah se an ṭangrual ṭhin, team thawkho ṭha zawk an dingchang leh ang.
Luangmual an fawr
Team thar ni mah se Luangmual an mikhual lo, an hma a ding apiang an hneh zel. Bungkawn nen hi league round-ah an hneh tawh a, semifinal-ah pawh hian rinkai zawk an ni. Mahse, set khatna la tue erawhin vanneihna an mamawh tel.
Bungkawn hian 220-20 a hma an hruaina an hum tlang thei lo, RK Lalfakmawii'n net a bel bakah F. Lalparmawii chuan court pawnah a vaw chhuak - Luangmualin an khingpui tihsual hi hmang ṭangkaiin set an la daih.
Set hnuhnung pahnihah Luangmualin an zia tak tak an chhuah a, dinhmun derthawngah an ding tawh lo. D3 Business Player of the Match atana thlan tak Nipa Barad a hmuhnawm - Gujarat tleirawl hian vawi 24 ngawt a vaw thla a, a ṭhiante zingah point 10 nei tling awm lo mah se chak nan a tawk.
Spikers chungah Hunthar
Tata SK 712 Pro Volleyball League mipa inelna league round bik chu Zirtawpni zan khan khelh zawh a ni a, semifinal-a inhmachhawn tur pahnih inkhelah Hunthar chuan Chhinga Veng Spikers chu 3-2 (25-21, 20-25, 25-22, 24-26, 15-13) in an hneh.
R. Dengṭhuama Indoor Stadium-a inkhel te hi an intawn hmain semifinal an lut tih a chiang tawh a, final luh inchuha inkhel tur an ni tih a chiang sa bawk; semifinal urlawkna a ni ber, league round ni mah se inkhel a pawimawh.
Hunthar tan Remsangzuala a hmuhnawm, an captain hi tun season PVL neih laiah setter zinga D3 Business Player of the Match ni thei hmasa ber a ni hial a, semifinal-ah pawh a hmuhnawm chhunzawm ang.
Chak lo zawk Chhinga Veng Spikers tan beisei a la bo lo, an set an hlohna te hi point tlemte chauh a ni hlawm - Hunthar laka point 22 nei thei pahnih Javed Khan leh Lalbiakmuana te awmna an nih avangin dah hniam an remchang lo.