Japan 8 - 4 India : India an tla

AFC Under-17 Asian Cup-ah India-in semifinal thlen an tum thu sawi mah se thu leh a tak ram chu thil hrang daih a ni - Zirtawpni zan khan champion lai Japan chu 8-4 in an ngam lo a, Blue Tigers-in Asian Cup an mangṭha ta.

India hian an match hmasa berah Vietnam chu 1-1 in an inhnehtawkpui a, match hnihnaah Uzbekistan chu 1-0 in an ngam lo bawk. India tan knockout round lut turin Japan hneh ngei ngei a ṭul a, mahse, an tlawm.

Japan hian minute 13-na aṭangin goal an khung ṭan a, first half chhungin goal thum an khung hman - Gakuto Kawamura shot chu India goalkeeper Sahil Poonia-a'n a en liam a, goal hnih khungtu Gaku Nawata-a goal hnih pawh dan theih niin lang mah se a chesual.

Chak mamawh India-in si thum an phur a, minute 47-naah Vanlalpeka Guite hmangin si phurh an sut ṭhen - Khawzawl rawlthar hian freekick aṭangin mawi zetin a thlawh lut a, Mukul Panwar chuan khawih fuh hman lo mah se official-ah erawh Panwar khung angin record a ni.

India an phur dawn chauh a, Japan an thiam hret! Shuta Nagano chuan buai nuai karah rawn khungin, Kohei Mochizuku chuan a khung belh bawk - Poonia bawk dem theih a ni.

Blue Tigers an beidawng duh bik lo - Thanglalsoun Gangte siamsak hmangin Danny Meitei-a'n a khung ve leh a, Daiki Miyagawa (own goal) chuan an lamah a tilut bawk. Goal pahnih luh karah Ryunosuke Sato-a penalty pet chu India keeper Poonia chuan a dansak a, 5-3 a ni.

Mahse, India beiseina neih chhung a rei lo ṭhin. Japan tan Yotaro Nakajima chuan an goal rukna a khung a, India tan a harsa tawh dawn tih a lang. Mahse, Bawngkawn winger Lalpekhlua chuan ṭha taka ball a tlan luhpui hnuah Korou Singh tan a siamsak a, India captain hian goal-a chantirin 6-4 a ni.

Blue Tigers hian na takin Japan an nawr zui a, mahse, goal an chhuah hnem hret avangin a harsa tawh a, hei hi Blue Samurai lamin remchangah an hmang zui. Gota Yamaguchi leh Shungo Sugiura ten injury time-ah an khung belh a, 8-4 in Japan an chak.

India number 10 Sentea chuan, "Kan inthlau lo - a bikin second half-ah khan kan inthlau lo a, kan goalkeeper chetsual kan tuar a ni," tiin Vanglaini a hrilh a, Khawzawl rawlthar chuan, "Kan la puithu mah mah ṭhin a, kan nih tur ang kan nih loh phah ṭhinin ka hria," a ti bawk.